Semei qalasynyń áýejaiyna Abai esimin berý týraly usynysty Shyǵys Qazaqstan oblystyq máslihatynyń depýtattary qoldady, dep habarlaidy "Ult aqparat" Semei qalasynyń aqparat ortalyǵyna silteme jasap.
«Semei qalasynyń áýejaiyna Abai esimin berý týraly jáne Semei qalasynyń bilim berý mekemelerine tanymal tulǵalardyń attaryn berý oblystyq onomastikalyq komissiiada maquldanyp, Shyǵys Qazaqstan oblystyq máslihatynyń depýtattary tarapynan qoldaý tapty. Qujattar respýblikalyq onomastika komissiiasyna jiberildi», delingen habarlamada.
Qaladaǵy №49 mektep te aqyn atymen atalady. Al Óskemendegi gýmanitarlyq kolledjge Abai esimi berilýi múmkin.
Kelesi jyly elimiz Abaidyń 175 jyldyǵyn toilaidy.
Aitýly mereitoiǵa orai oblys kóleminde 500-den astam shara ótedi.
Al, Nur-Sultan qalasynda «Abai álemi» degen úlken ortalyq salynady. Qala ákimshiligi óz esebinen Abai kóshesiniń boiynda uly aqynǵa úlken eskertkish ornatatyn bolady.
Semei qalasyndaǵy oqý oryndaryna kórnekti tulǵalardyń attary beriletin boldy. № 2 orta mektep - Qanysh Sátbaev, №3 mektep-keshen – Muhtar Áýezov, №34 mektep Baýyrjan Momyshuly, №37 mektep-gimnaziia - Ybyrai Altynsarin, №39 mektep - Álihan Bókeihan, №47 mektep- Ahmet Baitursynov, Prigorod orta mektebi - Júsipbek Aimaýytovtyń atymen atalady.
