Foto: Abai oblysy ákiminiń baspasóz qyzmeti
Semei qalasynda Abai eskertkishine gúl shoqtaryn qoiý rásimi ótti, dep habarlaidy "Ult aqparat" Abai oblysy ákimdiginiń baspasóz qyzmetine silteme jasap.
Ǵalymdar, qoǵam qairatkerleri, ziialy qaýym, depýtattar, jastar búgin uly jazýshy, aqyn, aǵartýshy Abai Qunanbaevtyń eskertkishine gúl shoqtaryn qoidy. Saltanatty sharaǵa Abai oblysynyń ákimi Nurlan Uranhaev qatysty.
Óńir basshysy bul sharanyń maqsaty uly tulǵaǵa taǵzym etý ǵana emes, el tarihynda baǵa jetpes mura, óshpes iz qaldyrǵan aqynnyń ómiri men shyǵarmashylyǵyn nasihattaý jáne esimine qurmet kórsetý ekenin atap ótti.
«Zamanalar aýysyp, dúnie didary kúnde ózgerse de, halqymyzdyń Abaiǵa degen qurmet sezimi esh kemimeidi! Úkimettiń qaýlysymen belgilengen osy kún de – sonyń aiǵaǵy. Aqynnyń mol murasy baǵa jetpes, rýhani asyl qazynamyz bolyp qala beredi. Qalyń elin, qairan jurtyn «jeti qarańǵy túnde» adastyrmai, «bes dushpannan» boi sýytyp, «bes asyl iske» asyqtyrǵan Uly Abai – týǵan halqymen máńgi jasaidy! Sebebi – osynaý almaǵaiyp zamanda, súienerimiz de, tabynarymyz da – Abai!», – dedi oblys basshysy Nurlan Uranhaev.
Esterińiz salsaq, Memleket basshysy Qasym-Jomart Toqaev óziniń «Abai jáne HHI ǵasyrdaǵy Qazaqstan» atty maqalasynda Abai murasy - ult bolyp birlesýimizge, el bolyp damýymyzǵa jol ashatyn qasterli qundylyq ekendigin atap ótken bolatyn. Osylaisha 10 tamyz Qazaqstanda «Abai kúni» bolyp belgilendi.
