Foto: BNews.kz
Eńbek jáne halyqty áleýmettik qorǵaý ministri Svetlana Jaqypova zeinetaqy jinaǵyna aqsha aýdarmai jumys istep júrgen qazaqstandyqtardyń zeinetaqysy qalai taǵaiyndalatynyn túsindirdi, dep habarlaidy Kazinform agenttigi.
Ministr Elektrondy eńbek birjasy portalyn tanystyrý úshin BAQ ókilderimen «galstýksyz» kezdesý ótkizip, jýrnalisterdiń saýaldaryna jaýap berdi. Qoiylǵan suraqtardyń arasynda 1998 jyldan keiin eńbekke aralasqan, biraq zeinetaqy jinaǵyna bir de bir teńge aýdarmaǵan adamdardyń keleshegi týraly suraq qoiyldy.
«Bazalyq zeinetaqy bárine kepildendirilgen, iaǵni bárine tólenedi. Eger ol azamattardyń biryńǵai zeinetaqy qoryna aýdarǵan jarnalary, aýdarymdary bolmasa, memleket olarǵa da bazalyq zeinetaqy tóleýden bas tartpaidy. Bazalyq túrde kómegin beredi. Biz ondai azamattardyń saraptamasyn júrgizemiz. Sol saraptamaǵa qarasaq, bizdiń halyq zeinetke shyǵatyn 3 jyl qalǵanda qimyldai bastaidy. Mysaly, er azamattar 63-te zeinetke shyǵady. Sondyqtan 60-qa kelgende bári zeinetaqy jarnasyn eń joǵary kólemde tólei bastaidy. Nege? Bizdiń zańda, kodekste jazylǵan. Zeinetaqynyń mólsheri keiingi 3 jyl nemese 36 ai boiy aýdarylǵan jarnalardyń ortasha kirisinen esepteledi. Sondyqtan qazir qazaqstandyqtar zeinet jasyna úsh jyl qalǵanda aýdarymdardy belsendi joldaýǵa úirenip alǵan. Soǵan qaraǵanda, biz ózimizdi ózimiz aldap otyrmyz. 1998 jyldan beri jarnasyn turaqty aýdaryp kele jatqan azamattar artylǵan somaǵa baspanasyn alyp, densaýlyǵyn túzep jatyr. Meniń aitarym, jumysqa turǵan kezde eńbek shartyn jasaý kerek. Naqty túrde aýdarymdardy ýaqtyly aýdarylǵanyn qadaǵalaý kerek», - deidi ministr.
Vedomstvo basshysy qoldanystaǵy zeinetaqy mólsherin taǵaiyndaý tásili ýaqyt kele ózgertiletinin eske saldy.
«Men aityp otyrmyn ǵoi. Taǵaiyndaý tásilin ózgertip, 1998 jyldan bastap nemese keiingi 25 jyldaǵy aýdarym kólemine bailanysty taǵaiyndalady dep jazamyz. Biraq ózińiz túsinesiz, halyq ondai ózgeristerge daiyn bolý kerek. Qazir zeinetke shyǵyp jatqan azamattardyń zeinetaqy mólsheri qoldanystaǵy norma boiynsha esepteledi. Al negizinen sekseninshi jyldary týǵan azamattarǵa jańa tásil engizemiz. Olardyń zeinetke shyǵýyna deiin áli ýaqyt bar ǵoi. Sondyqtan olar qazirden bastap jarnalardy turaqty aýdaryp otyrýy kerek. Iaǵni, olarǵa keiingi úsh jyldaǵy aýdarymdardyń ólshemi emes, keiingi 25 jyldaǵy aýdarymdary esepke alynady», - dedi Svetlana Jaqypova.
