Aqmola oblysynyń Shýchinsk qalasyndaǵy kóshege Qanai bi esimi berildi, dep habarlaidy "Ult aqparat" oblystyq sottyń baspasóz qyzmetine silteme jasap.
Kóshe ataýynyń berilýine Shýchinsk qalasynyń turǵyndary sonymen qatar, Qanai bidiń urpaqtary men mektep oqýshylary qatysty.
«Álemdegi eshbir halyqtyń, eshqandai memlekettiń damý tarihynda kezdespeitin, tek qazaq ultynyń sanasynda saqtalyp, onyń qoǵamdyq ómirine minsiz qyzmet etken biler soty, olar ustanǵan ádildik – bizdiń ónege alar, taýsylmas quqyqtyq bailyǵymyz. Sot biliginiń qazaq qoǵamyndaǵy ereksheligi sonsha keibir kezderi han biligimen qatar kei kezderde joǵary bolǵan. Bi hannyń aqylgói keńesshisi, rýhani tiregi ári ustazy retinde bolǵan. Bi ár ýaqytta halyq atynan sóiledi jáne onyń janashyry bolyp sanalady» - dedi Aqmola oblystyq sotynyń tóraǵasy Dosjan Ámirov.
Oblystyq sottyń tóraǵasy sýdialar qaýymdastyǵy men jergilikti atqarýshy organdardyń qazaq halqynyń bileriniń esimderimen aýyl jáne kóshe ataýlaryn ózgertý boiynsha eńbekterin atap ótti.
«Atalǵan jumys Qazaqstan Respýblikasy Joǵarǵy sotynyń basshylyǵymen Elbasynyń «Bolashaqqa baǵdar: rýhani jańǵyrý» jáne «Uly dalanyń jeti qyry» atty baǵdarlamalyq maqalalarynyń negizgi qaǵidalaryn júzege asyrý maqsatynda júrgizilýde» - dep tolyqtyrdy D.Ámirov.
Aita keteiik, Qanai bi Quttymbetuly – sheshen, batyr, Abylaihannyń bas keńesshisi. Aqmola oblysynyń Zerendi aýdanynda týǵan. XVIII ǵasyrlardaǵy orta júzdiń bedeldi kóshbasshysy, syrtqy jaýlarǵa qarsy ult-azattyq qozǵalystarǵa qatysýshy jáne uiymdastyrýshy, dańqty qolbasshy, qazaq jerin jońǵarlardan azat etýge úlken úles qosqan.
