Qazaqstanda ótetin kezekten tys Prezident sailaýynda múmkindigi shekteýli jandarǵa kómektesý úshin stýdentter men volonterdi shaqyrý usynyldy, dep habarlaidy QazAqparat tilshisi.
Bul usynysty QR Eńbek jáne halyqty áleýmettik qorǵaý ministri Berdibek Saparbaev Ortalyq sailaý komissiiasynyń keńeitilgen otyrysynda aitty.
Ministrdiń aitýynsha, sońǵy 2-3 jylda múmkindigi shekteýli jandardyń daýys berýine jaǵdai jasaýda ministrlik pen Ortalyq sailaý komissiiasy birlesip, eleýli jumystar atqardy.
«Kezekten tys sailaýda barlyq sailaýshylarǵa, onyń ishinde múmkindigi shekteýli azamattarǵa jaǵdai jasaýymyz kerek. Qazaqstanda 680 myń múmkindigi shekteýli adamdar turady. Odan balalardy jáne sot sheshimimen sailaýǵa qatyspaityn azamattardy alyp tastaǵanda, eń kemi 500 myń múgedek sailaýǵa qatysýy kerek. Sonymen birge, 2015 jyly múmkindigi shekteýli jandardyń quqyǵy týraly BUU konventsiiasyn maquldadyq, ózimizge halyqaralyq mindet aldyq. Sony oryndaýymyz kerek», - dedi Berdibek Saparbaev.
Ministr jergilikti bilik ókilderimen birge, múmkindigi shekteýli azamattardyń janynda kómekshilerdiń, sýroaýdarmashylardyń bolýyn qamtamasyz etýdi usyndy.
«Bizdiń oiymyzsha, jergilikti bilik ókilderi osy jumystarǵa, eriktilerdi, onyń ishinde 3-4 kýrstaǵy JOO stýdentterin paidalanýy kerek. Eń negizgisi - barlyq 9 950 sailaý ýchaskelerinde bul azamattarǵa jaǵdai jasalýy kerek. Byltyrdan bastap, bizdiń ministrlik janynda internet-portal jumys isteidi. Sol internet-portalǵa 30 myńnan astam áleýmettik jáne kólik infraqurylymy nysandary engizilgen, oǵan qosymsha 6,5 myńǵa jýyq sailaý ýchaskeleri de engizilgen», - dep atap ótti B. Saparbaev.
