Ortalyq sailaý komissiiasynyń múshesi Erlan Daýylbaev sailaý ótetin kúni daýys berý nysanyndaǵy ishki ister organdary qyzmetkerlerine qandai mindet júkteletinin túsindirip berdi, dep habarlaidy QazAqparat.
Aita ketsek Aqparat jáne qoǵamdyq damý ministrligi Ortalyq sailaý komissiiasymen birge ÚEU akademiiasy» bilim berý jobasy sheńberinde sailaýdy baiqaý negizderin túsindirýge arnalǵan seminar ótkizip jatyr. Otyrysqa onlain rejimde 500-den astam adam qatysýǵa niet bildirgen. Jiynda sailaýdy baiqaý negizderi túsindirilip jatyr.
«Daýys berý nysanyndaǵy tártipti qamtamasyz etý mindeti ishki ister organdaryna júkteledi. Ishki ister organdarynyń qyzmetkerleri ýchaskelik sailaý komissiiasy tóraǵasynyń shaqyrýymen ǵana daýys berý nysanynda bolýy kerek. Daýys berý nysanynda tártip ornaǵannan keiin ýchaskelik sailaý komissiiasy tóraǵasynyń ótinishi boiynsha birden daýys berý nysanynan shyǵyp ketýi tiis», - dedi Erlan Daýylbaev.
Ortalyq sailaý komissiiasynyń múshesi sonymen qatar sailaýshylardyń sailaý jáne daýys berý biýlletenin alý tártibin túsindirdi.
«Sailaý biýlletenin sailaýshylardyń tizimi negizinde azamattyń jeke basyn kýálandyratyn qujatty kórsetken kezde sailaý komissiiasynyń músheleri beredi. Ýchaskelik sailaý komissiiasynyń tóraǵasy men hatshysynyń daýys berýge arnalǵan sailaý biýlletenin berýge quqyǵy joq. Biýlletendi alǵannan keiin sailaýshy jeke basyn kýálandyratyn óz qujatyn kórsete otyryp, sailaý biýlletenin alǵany týraly sailaýshylardyń tizimine qol qoiady. Sailaý biýlletenin bergen komissiia múshesi óz tegi jazylǵan tizimge qol qoiady. Ózdigimen biýlletendi toltyrýǵa múmkindigi joq sailaýshy ózi senetin adamnyń kómegine júgine alady. Oǵan kómektesken adamnyń da aty men tegi atalǵan tizimge engizilýi tiis. BAQ ókilderi, sailaý komissiiasynyń músheleri, baiqaýshylar men máslihattyń nemese ákimdiktiń ókilderi sailaýshynyń senimdi ókili bola almaidy», - dedi ol.
