QR Prezidenttigine kandidattardyń memlekettik tildi meńgerý deńgeiin anyqtaityn lingvistikalyq komissiia tóraǵasy sailandy, dep habarlaidy QazAqparat tilshisi.
Bul qyzmetke filologiia ǵylymdarynyń doktory, professor, QR UǴA akademigi, L.Gýmilev atyndaǵy Eýraziia ulttyq ýniversiteti túrkologiia kafedrasynyń meńgerýshisi Myrzatai Joldasbekov laiyq dep tanylǵan.
«Ózderińiz bilesizder, Konstitýtsiialyq Keńes sheshimine sáikes, Ortalyq sailaý komissiiasy Lingvistikalyq komissiia qurdy. Onyń quramyna elimizge belgili azamattar endi. Búgin birinshi májilisimizdi ótkizip, synaq talaptaryn pysyqtadyq. Jasym úlken, jolym úlken dedi me, komissiia tóraǵasy retinde biraýyzdan meni sailady. Komissiia hatshysy qyzmetine professor Gúltas Qurmanbai bekitildi», - dedi Lingvistikalyq komissiia tóraǵasy Myrzatai Joldasbekov Ortalyq sailaý komissiiasynda ótken brifingte.
Otyrystan keiin lingvistikalyq komissiia tóraǵasy Myrzatai Joldasbekov úmitkerler tapsyratyn emtihan talaptaryn túsindirdi.
Tóraǵanyń aitýynsha, emtihan úsh kezeńnen quralǵan.
«Birinshi kezeńde úmitker konvertte jasyrylǵan taqyryptardyń birine jazbasha jumys tapsyrady. Jazbasha jumys 2 betten aspaýy kerek, ony jazýǵa 1 saǵat ýaqyt beriledi. Eger úmitker 1 saǵatta jazyp bitire almasa, komissiia aqyldasa kele, qosymsha jarty saǵat bere alady. Komissiia músheleri jumysty muqiiat tekseredi, árip qatesin, tynys belgilerin qadaǵalaidy. Máselen, 8 orfografiialyq qate tabylsa, ekilik qoiylady», - dedi Lingvistikalyq komissiia tóraǵasy Myrzatai Joldasbekov Ortalyq sailaý komissiiasynda ótken brifingte.
Ekinshi kezeńde úmitker komissiia usynǵan kólemi úsh betten aspaityn mátindi daýystap oqidy.
«Úmitkerler oqityn kitaptardy bekittik. Oǵan tek qazaq aqyn-jazýshylarynyń murasyn aldyq. Komissiia usynǵan kitaptardyń birinen úmitker 15 minýt úzindi oqidy. Bul kezeńde úmitkerdiń daýys yrǵaǵy, oqý máneri baǵalanady. Iaǵni, Prezident bolatyn qairatker memlekettik tilde erkin oqi alýy kerek dep esepteimiz», - dedi M. Joldasbekov.
Úshinshi kezeńde úmitker lingvistikalyq komissiia bergen taqyryptardyń birine sóz sóileýi qajet.
«Onyń da taqyryptary konvertke salynyp, bekitilgen. Ásirese, taqyryptar qazaq halqynyń tarihy, mádenieti, jetistikteri jóninde bolmaq. Úmitkerdiń sóz sóileýi komissiiany qanaǵattandyrmasa, taqyrypty tereńirek ashý úshin qosymsha suraqtar qoiýymyz múmkin. Apelliatsiia buǵan deiingi sailaýlarda tájiribemizde kezdespegen. Eger úmitkerler tarapynan shaǵym tússe, Ortalyq sailaý komissiiasy sheshim qabyldap, apelliatsiiany talqylaityn bolamyz», - dedi tóraǵa.
Atap ótken jón, lingvistikalyq komissiia otyrysyna onyń músheleri men QR Prezidenttigine úmitkerden basqa, QR Ortalyq sailaý komissiiasynyń músheleri baiqaýshylar retinde qatysady. Lingvistikalyq komissiianyń sheshimi komissiia músheleri sanynyń kópshilik daýsymen ashyq daýys berý arqyly qabyldanady, otyrys hattamasymen rásimdeledi.
Eske sala keteiik, 2019 jyldyń 9 maýsymynda elimizde kezekten tys prezidenttik sailaý ótedi.
19 sáýirde QR Ortalyq sailaý komissiiasy janynan prezidenttikke úmitkerlerdiń memlekettik tildi meńgerý deńgeiin anyqtaityn lingvistikalyq komissiia quryldy. Onyń quramyna Myrzatai Joldasbekov, Ádil Ahmetov, Ǵarifolla Esim, Serik Qasqabasov, Gúltas Qurmanbai, Erden Qajybek endi.
