QR Ortalyq sailaý komissiiasynyń múshesi Lázzat Súleimen prezidenttikke kandidattardyń qazaq tilin meńgerýin anyqtaityn lingvistikalyq komissiia múshelerin tanystyrdy, dep habarlaidy Baq.kz agenttigi.
QR Konstitýtsiiasynyń 41-babyna sáikes, prezidenttikke kandidattyń memlekettik tildi erkin meńgerýin QR Ortalyq sailaý komissiiasynyń qaýlysymen qurylǵan quramynda til mamandary jáne ózge de mamandar bar kem degende 5 adamnan turatyn lingvistikalyq komissiianyń qorytyndysy anyqtaidy.
«Sailaý jariialanǵannan keiin OSK Bilim jáne ǵylym ministrligimen, jetekshi oqý oryndarynyń rektorlarymen birneshe keńes ótkizdi. Osy keńesterdiń qorytyndysynda OSK janynan qurylatyn lingvistikalyq komissiianyń quramyna kelesi tulǵalar usynyldy»,- dep aitty Súleimen.
Olar: Myrzatai Joldasbekov – fiologiia ǵylymdarynyń doktory, professor, QR UǴA akademigi, L.N.Gýmilev atyndaǵy Eýraziia ulttyq ýniversiteti túrkologiia kafedrasynyń meńgerýshisi;
Ádil Ahmetov – filologiia ǵylymdarynyń doktory, professor, Halyqaralyq joǵary mektep ǵylym akademiiasynyń akademigi;
Ǵarifolla Esim – filosofiia ǵylymdarynyń doktory, professor, QR UǴA akademigi;
Serik Qasqabasov – filologiia ǵylymdarynyń doktory, professor, QR UǴA akademigi, L.N.Gýmilev atyndaǵy Eýraziia ulttyq ýniversiteti qazaq ádebieti kafedrasynyń meńgerýshisi;
Gúltas Qurmanbai – filologiia ǵylymdarynyń doktory, professor, Nazarbaev Ýniversiteti janyndaǵy «Rýhani jańǵyrý» mádeni ortalyǵynyń direktory;
Erden Qajybek – filologiia ǵylymdarynyń doktory, professor, QR UǴA korrespondent-múshesi, Ahmet Baitursynuly atyndaǵy til bilimi institýtynyń direktory.
Buǵan deiin QR prezidenttigine kandidattyń 107 psihikalyq aýrýy bar-joǵy tekseriletini týraly habarlaǵanbyz.
