2019 jyldyń 9 maýsymynda ótetin kezekten tys prezdenttik sailaý elimizde resmi tirkelgen 7 saiasi partiia óz kandidattaryn usynýy múmkin. Bul týraly búgin Ortalyq sailaý komissiiasynyń otyrysynan keiin BAQ ókilderiniń saýalyna jaýap bergen OSK múshesi Záýresh Baimoldina aitty, dep habarlaidy QazAqparat tilshisi.
«Ózderińiz biletindei, saiasi partiialardy tirkeýdi Ádilet ministrligi júrgizedi. Ádilet ministrliginiń bizge usynǵan málimetterine sáikes, qazirgi ýaqytta 7 saiasi partiia tirkelgen. Biraq, osy jerde 1,5 jylǵa jýyq jumys istep júrmin, 7-shi saiasi partiia belgisiz. Hat ta jónelttik, olardan jaýap kelip jatqan joq. Atalǵan partiianyń ókilderin shaqyrǵan sharalardyń birde-birine eshkim kelmedi», - dedi ol.
Z.Baimoldinanyń aitýynsha, dóńgelek ústel, baspasóz máslihaty, brifing, ǵylymi-tájiribelik konferentsiia syndy barlyq túrli sharalarǵa belsene qatysatyn 6 saiasi partiia bar. Olar: «Nur Otan», Aq jol, Qazaqstan kommýnistik halyq partiiasy, Birlik, Aýyl, jáne Qazaqstannyń jalpyulttyq sotsial-demokratiialyq partiiasy.
«Qansha respýblikalyq qoǵamdyq birlestik bar ekendigi týraly aqparatty esh ýaqytta suratpaimyz. Bul Ádilet organdarynyń quziretine jatady. Qazirgi ýaqytta olar el prezidenttigine kandidat usyna alatyn bolǵandyqtan keiin ǵana nazarymyzdy aýdartyp otyr. Eger respýblikalyq qoǵamdyq uiymdar kandidatyn usynatyn bolsa, onda biz olarmen de jumys isteimiz», - dedi QR OSK múshesi.
