Saiajai - Sovet odaǵy kezinde qaladaǵy qoly jetkende ǵana bolatyn. Ol bir jazǵy demalysqa, jemis-jidek egip, sonyń qyzyǵyn kórýge arnalǵan dúnie siiaqty edi.
Al, qazir saiajai degen - qalaǵa endi kóship kelgen qazaqtyń qonysy. Qutty qonysy, jaily jurty deýge kelmeidi. Basqa baspanasy, turatyn turaǵy joq aǵaiynnyń irge tepken jeri. Qazaqtyń qalalyq ult bolýǵa degen umtylysyn, ýrbanizatsiiany rettemegen ókimettiń jibergen kemshiligi. Soǵan qaramai, Ultyq ekonomika vitse-ministri saiajailardyń mártebesin (statýsyn) aýyldyń, qalanyń deńgeiimen shendestirmeimiz dedi. Bir depýtattyń saýalyna osyndai jaýap ashyq aityldy.
Ol ne degen sóz? Ol saiajai jaryq, sý, jol, aýrýhana, mektep t.b. máselesin ózi sheshsin, qaitip sheshse, óitip sheshsin, bizdiń sharýamyz joq degen sóz. Ondai zańdyq statýsy tómen jaidyń súrilip tastaýy da, kez-kelgen dúnieden qaǵylyp tastaýy da ońai. Izdeýi, suraýy bolmaidy. IJS emes jerge úi salyp alǵan ózinen kórsin degen osy.
Almatynyń mańyndaǵy Shamalǵan beketi jaq, Talǵardyń etek jaǵy, Tarazdyń Aisha bibi jaǵy, Semeidiń "Vostochnyiy" t.s.s kete beredi. Qalany jaǵalai qonǵan el. Tirkeýi joq, salǵan úiiniń qujaty shala, balabaqsha - eles. Al, Aqtóbede 30 myń adam osyndai saiajaida turady eken. Sanaqqa enbepti. Politsei men Jedel járdem barmaidy. Buny oblys ákimi B.Saparbaev aityp otyr. Sózbe sóz áńgimesi bylai: "Dachada tártip joq. Biz tártip ornatýymyz kerek. Sondyqtan biz tekserý júrgizdik.
Otyz myńnan asa adam esepte joq, bilesizder me? 30 000-nan asa adam esepte joq. Qazir onyń bárin biz qarap jatyrmyz. Dachanyń bárin biz zańǵa sáikestendiremiz. Sosyn baryp ol jerde jol, jaryq, sý bolady". Aqtóbede osylai bolsa, Shymkent pen Petropavlda da osy jaǵdai. Búkil eldegi másele osy. Biraq, Saparbaevtyń basqa ákim-qaralardan bir artyqshylyǵy osyny sheshý kerek dep otyr. Áitpese, ysyra salýǵa bolatyn-aq edi. Endi tek, osy dúrmekpen, ábden qordalanǵan máseleni jalpy el bolyp sheshýdiń jolyn qarastyrý kerek. Óitkeni, Úkimet deńgeiinde sheshilmese, ákimniń sheshimi ýaqytsha ǵana, jartylai ǵana sheshim bolyp qalýy múmkin. Úkimetke "Saiajaida halqyń bar, Ony nege kórmeisiń!" deitin kez keldi.
Bolat Múrsálim
