Qasiretti Qańtar
oqiǵasynan beri týra eki jyl ótti. Qańtar Qazaqstan tarihyndaǵy jańa dáýirge
jol ashqan betburystyń belesi boldy. Memleket basshysy Qasym-Jomart Toqaevtyń
«Egemen Qazaqstan» gazetine bergen suhbatynda "Qasiretti Qańtar"
oqiǵasy týraly egjei-tegjeili aitty, dep habarlaidy "Ult aqparat"
SkifNews-qa silteme jasap.
Prezidenttiń sózinshe, qasiretti Qańtar oqiǵasyna jyldar boiy qordalanǵan áleýmettik-ekonomikalyq problemalar, jalpy toqyraýdyń bilik pen qoǵamdy azdyryp-tozdyrýy sebep boldy.
Men 2019 jyly prezident bolyp sailanǵannan keiin memleketimiz saiasi júieni demokratiialandyrýǵa, qoǵamdyq ómirge erkindik sipat berýge, ekonomikany monopoliiadan aryltýǵa bet burdy. Reformalardy ázirleýge jáne ony júzege asyrýǵa qoǵam ókilderi, belsendi azamattar, sarapshylar qatysty. Túrli dialog alańdarynda, sonyń ishinde, meniń usynysymmen arnaiy qurylǵan Ulttyq qoǵamdyq senim keńesiniń otyrystarynda kóptegen bastama kóterilip, jan-jaqty pysyqtaldy. Ashyǵyn aitsam, osy jańa baǵdarymyz keibir yqpaldy adamdarǵa múlde unaǵan joq. Olar bul ózgeristi elimizde ábden tamyr jaiǵan júiege jáne bilik qurylymyndaǵy ózderiniń «erekshe mártebesine» tóngen qater dep qabyldady. Mundai adamdar eldegi ózgeriske astyrtyn, keide tipti ashyq qarsylyq bildire bastady. Aqyr sońynda reformanyń betin qaitaryp, ózderine yńǵaily burynǵy qalypqa oralý úshin bárin tas-talqan etýge sheshim qabyldady, – deidi Toqaev suhbatynda.
Saiasatker Samat Nurtazanyń aitýynsha Prezidenttiń sol kezde qabyldaǵan sheshimderi batyl bolyp, ol memleket basshysy retinde óz mindetin oryndady.
Konstitýtsiia boiynsha Prezidentimiz qaýipsizdiktiń kepili ǵoi, sondyqtan ol kisiniń mindeti óz halqyn qorǵaý. Qańtardyń basynda bizge qiyn-qystaý zaman týǵanda Prezidentimiz keibir elderdiń basshylary siiaqty qashyp ketpei, óz qara basyn oilamai, óziniń bedelin, biografiiasyn deýge bolady, báigege salyp elimizdi qorǵady. Batyl sheshimder qabyldady. Múmkin, batystyń sarapshylary, keibir memleketter UQShU quramyndaǵy memleketterden kómek suraýdy áli kúnge deiin túsinbei otyr. Bul jerde Qazaqstan óziniń dostaryn kómekke shaqyrdy dep esepteýge bolady. Men oǵan kámil senemin. Sebebi, adam ózi qinalǵanda dostaryn shaqyrady ǵoi, sol siiaqty memlekette qinalǵan tusta dostaryn shaqyrdy. Dostary keldi, kómektesti, qorǵady, qaitadan elderine ketti. Keibir adamdardyń qorqynyshy boldy ǵoi, «olar qalyp qoiady, shyqpaidy» degen. Olai emes. Ákki diplomat retinde, kásipqoi saiasatker retinde Prezidentimiz olardy ákele de bildi, shyǵara da bildi. Sondyqtan, bul jerde taza logikamen sóileý kerek dep esepteimin.
Qańtar aiynda, ásirese, Almaty qalasynyń halqy zardap shekti. Sondai kezde Memleket basshysy jaǵdaidy óz qolyna alyp, senimsiz adamdardy laýazymynan aiyryp, senimdi adamdardyń ókilettigin keńeitti. Jalpy máseleni sheshti dep esepteimin. Osyndai qiyn-qystaý zamanda bir qatelik ketip, Almaty qalasy nemese jaqyn qalalar terrorshylarǵa, qylmyskerlerge ótip ketkende ne bolar edi? Ony elestetýdiń ózi qorqynyshty. Osy qańtar qasiretinen keiin bizde beibit ómirdiń, ashyq aspannyń qadirin túsindik. Buryn aýyzben aityp qana qoisaq, búginde júrekpen túsindik. Janyp jatqan ǵimaratty, kólikti kórdik. Mert bolǵan beibit halyqty kórdik. Oqqa ushqan politsiia qyzmetkerlerin kórdik. Sondyqtan da, osynyń bári úlken sabaq bolady. «Qandy sabaq» bolady deýge negiz bar. Bizdiń jáne bolashaq uqpaqtyń mindeti osy «qandy qańtardan» sabaq alyp, onyń qaitalanbaýyna atsalysýymyz kerek. Tynyshtyqtyń keremet syi ekenin túsinip jatyrmyz, - dedi sarapshy.
