Foto: visaget.ru
Syrtqy ister ministrliginiń resmi ókili Aibek Smadiiarov qazaqstandyqtar úshin Eýropalyq odaqqa kiretin viza tártibin jeńildetý máselesin túsindirdi, dep habarlaidy Sputnik Qazaqstan.
Biyl syrtqy ister ministri Briýsselge bardy. Sapar barysynda Eýropalyq odaqtyń viza máselesine jaýap beretin joǵary laýazymdy tulǵalarmen kezdesý ótti. Smadiiarovtyń aitýynsha, eki tarap qazaqstandyqtar úshin viza tártibin jeńildetý jóninde saiasi sheshimge keldi.
"Ótken aptada konsýldyq máselelerge jaýapty syrtqy ister ministriniń orynbasary Qazaqstandaǵy Eýropa elshilikteriniń ókilderimen kezdesti. Sonda eýropalyq tarap osy máselege qatysty úlken qyzyǵýshylyqtyń bar ekenin rastady. Barlyǵy bul baǵytta jumysty jalǵastyrýǵa daiyn", - dedi Smadiiarov búgingi brifingte.
Ministrliktiń resmi ókili naqty merzimdi ataǵan joq. Sebebi Eýropalyq odaqqa kiretin 27 eldiń árbirimen kelisý kerek.
"Biz mindetti túrde aldymen árbir elmen jeke-jeke sóilesemiz. Ári qarai Briýsselde taǵy talqylanady", - dep atap kórsetti Smadiiarov.
Viza tártibin jeńildetý aiasynda qujattardy qarastyrý merzimin qysqartý, konsýldyq alymnyń mólsherin tómendetý jáne taǵy basqa máseleler qaralady.
