Saiasi oiyn erejesiniń ózgerý tabaldyryǵynda turmyz. Mundai pikirdi saiasattanýshy Maksim Kaznacheev bildirdi, dep habarlaidy QazAqparat.
«Osy jolǵy sailaý naýqanynda biz úshin basty qyzyǵýshylyq – bul saiasi tranzit qorytyndysyn bekitý. Is júzinde jańa Parlamenttiń qalyptasýy Qazaqstannyń saiasi júiesin qyzmettiń jańa rejimine shyǵarady. Parlament quramynyń ózgerýimen Úkimetti jasaqtaý jáne áleýmettik-ekonomikalyq bloktyń jetekshi laýazymdaryna ministrlerdi taǵaiyndaý printsipi ózgeredi. Qoǵam tarapynan da, negizgi toptar tarapynan da sailaýǵa qyzyǵýshylyq óte joǵary. Túptep kelgende biz saiasi oiyn erejesiniń ózgerý tabaldyryǵynda turmyz. Sondyqtan 2019-2021 jyldardyń sailaý tsiklin túiindeitin sailaýlar bizdiń kózqarasymyzsha kóp úmit kúttiredi», - dedi saiasattanýshy Qazaqstandaǵy sailaýǵa qatysty uiymdastyrylǵan dóńgelek ústel otyrysynda.
Onyń atap ótýinshe, koronavirýs pandemiiasy saldarynan ekonomikalyq qiyndyqtarǵa bailanysty áleýmettik shielenistiń azdap óskeni baiqalyp otyr. Degenmen, elimizdiń ekonomikalyq ornyqtylyq qory joǵary. Iaǵni, sailaý tsikli turaqty ahýaldy saqtap qala alady.
«Qoldanystaǵy bilik júiesi aiasynda biyl bastapqy býynnyń jergilikti ákimshilikteri basshylaryn sailaý josparlanǵan. Bul biz úshin birinshi tájiribe sanalady. Osy jyly alǵash ret tikelei sailaýdy synnan ótkizip kórýge tyrysamyz», - dedi Maksim Kaznacheev.
