QR Prezidenti Ákimshiligi basshysynyń birinshi orynbasary Dáýren Abaev saiasi qýǵyn-súrgin qurbandaryn aqtaý jónindegi memlekettik komissiianyń missiiasyn jariia etti, dep habarlaidy QazAqparat.
«Búgin Prezident Qasym-Jomart Toqaev óz úndeýinde saiasi qýǵyn-súrgin qurbandaryn aqtaý jónindegi memlekettik komissiianyń qurylǵandyǵyn jariia etti. Bul - tarihi ádildikti qalpyna keltirý isindegi elimizdiń kezekti qadamy. Sol jyldardaǵy qýǵyn-súrgin - tarihymyzdyń janyndaǵy jazylmaǵan jara. Protsesterdiń buqaralyǵy, jabyqtyǵy, qupiialyǵy ókinishke orai, kóptegen aqtańdaq qaldyrdy. Kinásiz qýǵyn-súrginge ushyraǵandardyń barlyǵy birdei aqtalǵan joq. Bizdiń málimetterge sáikes, búgingi kúni 6 myńǵa jýyq isti qaraý qajet. Halqymyzdyń quqy úshin de kúreskenderdi aqtaýǵa tiispiz. Máselen, 1910-1930 jyldardaǵy halyq kóterilisine qatysýshylardy aitalyq, 1929 jylǵy Batpaqqara kóterilisine qatysqan 500 adamnyń tek úsheýi ǵana aqtalǵan»,- dep jazdy Dáýren Abaev jelidegi paraqshasynda.
Onyń atap ótýinshe, tarihty ózgertip, tas-talqan bolǵan taǵdyrlardy qalpyna keltire almaimyz. Ólgenderge qaita ómir berý de múmkin emes. Biraq, olardyń urpaqtary, keleshek qazaqstandyq urpaqtar aldyndaǵy paryzymyz - kinásiz sottalǵandardyń jarqyn beinesin saqtaý.
«Jańadan qurylǵan organnyń missiiasy - saiasi qýǵyn-súrgin qurbandaryn tolyqtai saiasi jáne zańdy túrde aqtaý jaqsatynda júieli jumystardy uiymdastyrý. Prezidenttiń komissiia aldyna qoiǵan mindetteri jáne onyń aiasynda júrgiziletin jumystar mynadai: Birinshiden, jappai saiasi qýǵyn-súrgin qurbandaryn aqtaý týraly zańnamalyq usynystar ázirleý; Ekinshiden, japai saiasi qýǵyn-súrgin qurbanyna teńestiriletin jáne saiasi aqtaýǵa jatatyn tulǵalar sanatyn bekitý; Úshinshiden, aqtalǵandardy máńgi este qaldyrý, olardyń jerlengen jerlerin izdeý jáne kútip-ustaýdy retke keltirý boiynsha usynystar ázirleý; Tórtinshiden, aqtalǵandardyń quqyqtaryn qalpyna keltirý máseleleri boiynsha ótinimder men shaǵymdardy qaraý. Atalǵan mindetter memlekettik komissiia jumysy sulbasyn naqty beineleidi. Onyń barysy jaiynda qoǵamǵa turaqty túrde aqparat beriletin bolady», - dedi Dáýren Abaev.
