Biyl 24 qarashada Memleket basshysy Qasym-Jomart Toqaev «Saiasi qýǵyn-súrgin qurbandaryn tolyq aqtaý jónindegi memlekettik komissiia týraly» Jarlyqqa qol qoiǵan bolatyn.
Osyǵan orai, búgin Nur-Sultan qalasynda Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen Saiasi qýǵyn-súrgin qurbandaryn tolyq aqtaý jónindegi memlekettik komissiianyń birinshi otyrysy ótti, dep habarlaidy "Ult aqparat" Aqordanyń resmi saityna silteme jasap.
Memlekettik komissiia quramyna QR Prezident Ákimshiligi men Úkimetiniń ókilderi, QR Parlamenti Senaty men Májilisiniń depýtattary, múddeli memlekettik uiymdardyń basshylary, qoǵamdyq uiymdardyń ókilderi men elimizdiń ǵalymdary bar. Barlyǵy Komissiia quramyna 49 adam kiredi.
Memlekettik hatshy óziniń sóilegen sózinde Memlekettik komissiianyń basty mindeti – keńestik kezeńdegi saiasi qýǵyn-súrgin qurbandarynyń barlyq sanattaryna qatysty tarihi ádilettilikti tolyq qalpyna keltirý ekenin atap ótti. Materialdarǵa jan-jaqty ári keshendi zerdeleý júrgizgennen keiin, halyqaralyq tásilder men standarttar negizinde tolyqtai zańdy, al jekelegen sanattarǵa qatysty – qýǵyn-súrgin qurbandaryn saiasi aqtaý josparlanyp otyr.
Otyrys barysynda Memlekettik komissiianyń qyzmetin uiymdastyrýdyń mindetteri men negizgi sátteri, onyń 2020-2021 jyldarǵa arnalǵan jumys jospary, qýǵyn-súrgin qurbandarynyń túrli toptaryn aqtaý jónindegi qyzmetti ádisnamalyq qamtamasyz etý máseleleri qaraldy. Qýǵyn-súrginge ushyraǵan ár túrli toptardy aqtaý baǵyttaryn pysyqtaý úshin arnaiy jumys toptaryn qurý usynyldy.
Otyrys qorytyndylary boiynsha Memlekettik komissiia tóraǵasy Qyrymbek Kósherbaev múddeli memlekettik jáne jergilikti atqarýshy organdarǵa Memlekettik komissiia qyzmeti máseleleri jóninde birqatar naqty tapsyrma berdi.
