Saiasattanýshy Qazbek Maigeldinov Parlament Májilisi depýtattarynyń kezekti sailaýyna qatysty máseleler Nur-Sultan qalasynda ǵana emes, elimizdiń basqa aimaqtarynda da talqyǵa salynǵany jón ekendigin aitty, dep habarlaidy QazAqparat.
Bul týraly ol Óskemen qalasynda ótken «Sailaý-2021: mańyzy men erekshelikteri» atty sarapshylar keńes otyrysynda málim etti.
«Óńirlerdegi osyndai otyrystardyń mańyzy zor. Sebebi Parlament Májilisi depýtattarynyń kezekti sailaýyna qatysty máseleler elimizdiń bas qalasynda ǵana emes, aimaqtarda da talqyǵa salynǵany abzal. 10 qańtarda bolatyn sailaý erekshe rejimde ótkizilmek. Olai deitinim, bul sailaý koronavirýs pandemiiasyna, álemdegi ekonomikalyq daǵdarysqa tuspa-tus kelip otyr. Keibir úmitkerler osyny paidalanyp ádemi sózderdi, qurǵaq ýádelerdi úiip-tógýi múmkin. Sondyqtan halyq tańdaý jasar kezde barlyǵyn ekshep, oi eleginen ótkizýi kerek», - dedi Qazbek Maigeldinov.
Onyń aitýynsha, sońǵy 5 jyl ishinde qoǵamda saiasi belsendilik artty. Biraq buǵan saiasi mádeniettiń tómendigi sebep bolǵan. Sonyń saldarynan halyq áleýmettik jelidegi jalǵan aqparattarǵa jii senip qalyp jatady.
«Qazir kim kóp laik jinasa, jurt sonyń pikiri durys eken dep oilaidy. Tipti onyń jazǵany negizsiz bolsa da. Sol úshin Parlament Májilisine «popýlizmmen» ainalysatyn emes, realistik kózqarastaǵy adamdar qajet. Demokratiia norma men protsedýralardan turatyndyǵyn umytpaiyq. Eger biz qandai da bir normalarǵa baǵynbasaq, onda saiasi beiberekettik týyndaidy», – dedi saiasattanýshy.
Óz sózinde ol búginde memleket qoǵamnyń pikirin eskerip, zańǵa birqatar ózgerister engizgenin aitty. Sailaýǵa qatysty jańa zańda da talai jańashyldyqtar bar. Onyń ishinde ásirese saiasi partiia qurý jáne tirkeýdiń jeńildetilgenin atap ótken jón.
