QR Parlamenti Májilisiniń depýtaty Saýytbek Abdrahmanov Prezident Joldaýyndaǵy jańa bastamalar jóninde pikir bildirdi, dep habarlaidy QazAqparat.
«Memleket basshysynyń qai sózi de mańyzdy. Ásirese jyl saiynǵy dástúrli Joldaýdyń jóni bólek. Óitkeni Prezident Joldaýy – jyldyń basty qujaty. Búgin de kóptiń kóńilinen shyǵatyn, jurttyń júregine jetetin Joldaý boldy dep nyq senimmen aita alamyn. Óitkeni, Toqaevtyń sózinde ómirimizdiń eń bir ózekti máseleleri kórsetildi. Negizinen problemalarǵa quryldy, qoldaǵy bar tabystardy ornyqtyrýdyń jáne jańa shepterdi alýdyń qiyn mindetteri alǵa qoiyldy. Al elge tikelei keletin jaqsylyqtardy aitsaq, aldaǵy 5 jylda sapaly aýyz sýmen 100 paiyz qamtamasyz etý – el úshin erekshe qýanyshty jaǵdai bolmaq. Sodan keiin eń tómengi jalaqy mólsherin 60 myń teńgege deiin ósirý de milliondaǵan adamdardyń turmystyq jaǵdaiyn jaqsartatyn dúnie, sebebi barlyǵy osy kórsetkishke bailanysty ózgeredi», - dedi depýtat Parlament Májilisinde tilshilerge bergen suhbatynda.
Sonymen birge, Joldaýda áleýmettik sala qyzmetkerleri jalaqysyn 2022-2025 jyldary 20 paiyzdan asyryp otyrý kózdelgen, bul ózgeris 650 myń adamdy qamtidy.
«Sodan keiin eldiń psihologiiasyn ózgertý, paternalistik psihologiiadan arylý, masyldyq kóńil-kúiden arylý jóninde úlken máseleler aityldy. Ult ziialylarynyń missiiasy týraly aityldy. Jalpy kóp oiǵa qaldyratyn, tolǵandyratyn, aldaǵy mindetterdiń kúrdeliligin halyqqa sezindiretin Joldaý boldy dep aitamyz. Endi tek iske kirisý kerek», - dedi S. Abdrahmanov.
Aita keteiik, búgin Qasym-Jomart Toqaev Parlamenttiń eki palatasynyń birlesken otyrysynda Qazaqstan halqyna jyl saiynǵy Joldaýyn jariialady. Joldaýda Prezident elimizdiń áleýmettik-ekonomikalyq damýynyń aldaǵy jylǵa arnalǵan basym maqsattaryn jariia etti.
