Qarjy sektoryn saýyqtyrý aiasynda 6,6 trillion teńgege jýyq nashar nesieler esepten shyǵaryldy. Bul týraly Prezident Qasym-Jomart Toqaev Almatyda qarjy sektorynyń ókilderimen kezdesýde aitty, dep habarlaidy "Ult aqparat".
Jiynda Memleket basshysy, eń aldymen, qarjy sektorynyń turaqtylyǵyna toqtaldy. Sondai-aq búginde qarjy sektorynyń dármensiz bankterden arylǵanyn, al saýyqtyrý aiasynda 6,6 trillion teńgege jýyq nashar nesieler esepten shyǵarylǵanyn atap ótti. Qasym-Jomart Toqaevtyń aitýynsha, óteý merzimi 90 kúnnen asqan qaryzdardyń deńgeii bankterdegi nesie portfeliniń 4,3 paiyzyn quraidy. Bul – sońǵy 13 jyldaǵy eń tómengi kórsetkish. Prezident osydan qorytyndy shyǵaryp, jinaǵan tájiribe negizinde jii qaitalanatyn táýekel-qaterlerdiń aldyn alý sharalaryn kúsheitý qajet ekenine toqtaldy.
Prezidenttiń aitýynsha, bankter memlekettik qoldaýdyń arqasynda búginde ekonomikany nesieleý boiynsha zor áleýetke ie bolyp otyr. Bank júiesindegi ótimdiligi joǵary aktivterdiń kólemi – 12,2 trillion teńge.
«Biyl turǵyndar suranysynyń belsendi túrde qalypqa kele bastaǵanyn baiqap otyrmyz. Tutynýshylyq nesie 32,8 paiyzǵa artqan. Nesie alýshylar 6,1 million adamǵa jetti. Bálkim, bul qalypty úderis. Alaida azamattarymyzdyń qaryz júktemesine tiimdi baqylaý jasaý mańyzdy. Qazirgi ýaqytta 545 myń adamnyń qaryzyn óteý merziminiń kesheýildeýi 90 kúnnen asqan. Másele elimizdiń qarjy turaqtylyǵyna tóngen táýekel-qaterde ǵana emes. Bul kóptegen azamattarymyzdyń qarjy tapshylyǵymen betpe-bet kelgenin bildiredi. Bul áleýmettik jáne saiasi turaqsyzdyqqa alyp kelýi múmkin», – dedi Prezident.
