Jańa oqý jyly qarsańynda Túrkistan oblysy, Saýran aýdanynda zamanaýi úlgidegi úsh jańa mektep paidalanýǵa berildi. Búgin 400 oqýshyǵa arnalǵan «Jańa Iqan» mektebi men 400 oryndyq «Daryn KZ» mektebiniń jáne 200 oryndyq «Dara bala» bastaýysh mektep- balabaqshasynyń ashylý saltanaty ótti.
Jańa Iqandaǵy jańa mektepterdiń fizika, himiia, informatika, biologiia kabinetteri sońǵy úlgidegi tehnikalarmen jabdyqtalǵan. «Jańa Iqan» mektebine 400-ge jýyq oqýshy qabyldanyp, 50-ge jýyq ustaz, 10 kishi qyzmetker jumyspen qamtyldy. Al «Daryn KZ» mektebiniń alǵashqy oqýshylary bolyp 250-den astam oqýshy qabyldanyp, 40-qa jýyq ustaz ben 10 kishi qyzmetker jumysqa qabyldandy.
Jańa Iqandaǵy qos mekteptiń ashylý saltanatyna qatysqan aýdan ákimi Ǵani Qurmashuly bul eki iri mektepten bilimdi de daryndy urpaq tárbielenip shyǵatynyna senim bildiretinin jetkizdi.
«Jańa aýdanymyzdy damytý úshin ár salada tynymsyz eńbek etip kelemiz. Bilim salasynda da igi ister atqarylyp, aýdan qurylǵaly beri birneshe jańa mektep paidalanýǵa berildi. Sonymen qatar aýdanymyzdaǵy kóptegen mekteptiń ataýy ózgerip, ult ziialylarynyń, batyrlar men bilerdiń esimi berildi. Jańa Iqanda da qos birdei úlken mektep ashylyp, halyqtyń qýanyshy eselene tústi. Jańa mektepten elimizdi jańa deńgeige kóteretin bilimdi de ultjandy urpaq tárbielenip shyǵatynyna senimdimin», – dedi aýdan ákimi.
Shornaq aýyldyq okrýginde ashylǵan «Dara bala» bastaýysh mektep- balabaqshasynda qazaq, orys synyptary, uzartylǵan kún toby, sonymen qatar balalardy túrli ónerge baýlityn dombyra, shahmat, bi, t.b úiirmeler bar. Bolashaqta robototehnika úiirmesin jetildirý de josparlanýda. Sondai-aq balalardy tasymaldaityn arnaiy kólik te qarastyrylǵan.
