AQSh-ta valiýta basqarmasy jetekshiliginen úmitker bolyp, respýblikashyldar tarabynan qatań synǵa ushyraǵan Qazaqstan týmasy Sáýle Omarova kandidat bolýdan bas tartty. Bul jóninde Aq úige súiengen Reuters agenttigi habarlady.
55 jastaǵy Omarovany AQSh valiýta basqarmasynyń jetekshiligine el prezidenti Djo Baiden usynǵan. Ol 1966 jyly Oral qalasynda týyp, 1991 jyly AQSh-qa qonys aýdarǵan, keiin AQSh azamattyǵyn alǵan.
Sáýle Omarovanyń AQSh valiýta basqarmasynyń jetekshisine bas úmitker ekeni biyl tamyzda belgili bolǵan. Qyrkúiekte Djo Baiden ony Qarjy ministrligi quramyndaǵy Valiýta basqarmasynyń jetekshisi qyzmetine usynýǵa nietti ekenin bildirgen kezde AQSh qoǵamynda qyzý talqy týǵan. Bankter men respýblikashyldar Omarovanyń ideialaryn tym radikal sanap, oǵan qatty qarsylyq tanytqan.
Buǵan deiin AQSh kongresinde Sáýle Omarovanyń kandidatýrasy talqylanyp, respýblikashyldar onyń Sovet odaǵynda týyp-óskenine shúilikken.
Reuters'tiń jazýynsha, Baiden ákimshiligi quny 1,75 trln dollar bolatyn áleýmettik qoldaý jáne ǵalamdyq jylynýmen kúres sharalaryn qabyldatý úshin barlyq demokrattardyń qoldaýyna zárý bolyp otyrǵan shaqta ol usynǵan Omarova kandidatýrasy maquldanbai otyr. Aqparatqa qaraǵanda, senattaǵy keminde on demokrat onyń kandidatýrasyn qoldamaǵan.
Aq úi málimdemesinde Baiden onyń qarjy salasyn retteýdegi "tereń saraptamasyn" maqtap, "onyń jeke basyna shúilikkenderdi" synaǵan.
Sáýle Omarova – Baiden ákimshiligi usynyp, keri qaitarylǵan úshinshi kandidat. Buǵan deiin ákimshilik biýdjet basqarmasy jetekshiligine Nira Tanden men Ishimdik, temeki, qarý-jaraq jáne jarylǵysh zattardy retteý biýrosynyń jetekshiligine Devid Chimpan usynylyp, úmitkerler keri qaitarylǵan.
AQSh-ta valiýta basqarmasynyń jetekshiligine kandidatty prezident usynǵanmen senat maquldaidy. Sáýle Omarova kandidatýrasy bekitilýi úshin senattaǵy demokrattar biraýyzdan ony qoldaýy tiis bolǵan.
