Sáýirde koronavirýsqa qarsy vaktsina alatyn kontingent keńeitiletin bolady. Bul týraly QR Densaýlyq saqtaý vitse-ministri – Bas memlekettik sanitar dáriger Erlan Qiiasov aitty, dep habarlaidy QazAqparat.
«Respýblikada koronavirýs infektsiiasyna qatysty vaktsinatsiia jalǵasyp jatyr. Búginde birinshi komponentpen 83 839 adamǵa ekpe jasaldy. 22 aqpannan bastap ekinshi komponentpen vaktsinatsiialaý bastaldy. 19 312 adam ekpe aldy. Qolaisyz jaǵdailar tirkelgen joq. Vaktsinatsiia elimizdiń barlyq óńirinde júrip jatyr. 628 ekpe pýnkti qurylǵan. Onyń 451-i jumys istep tur. Barlyǵy da vaktsinany salqyn jerde ustaýǵa qajetti qural-jabdyqpen qamtamasyz etilgen», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, naýryz aiynyń sońyna deiin elimizde «Spýtnik V» vaktsinanyń 150 myń dozasy jetkiziletin bolady. Olar elimizdiń barlyq óńirine 1 sáýirge deiin bólinip beriledi.
«Osyǵan bailanysty sáýirde koronavirýsqa qarsy immýndaýǵa jatatyn kontingenttiń keńeietindigi kútilip otyr», - dedi Erlan Qiiasov.
