«Qazgidromet» RMK aldaǵy aidyń aýa raiy boljamyn jariialady, dep habarlaidy "Ult aqparat".
«Aldaǵy sáýir aiy jyly ári jaýyn-shashyndy bolady dep kútilip otyr. Ásirese, bul qubylys aidyń birinshi jáne ekinshi onkúndiginde jii baiqalady. Sondai-aq, sáýir aiynda jyly jáne sýy kúnder alma kezek bolatynyna bailanysty qubylmaly kún raiy kútiledi. Ol kezde eń tómengi temperatýralar birinshi onkúndiktiń sońyna qarai bolady. Elimizdiń soltústik óńirlerinde aýanyń túngi temperatýrasy 5-15 gradýsqa, kúndiz 0-5 gradýsqa deiin tómendeidi. Al elimizdiń ońtústik bóliginde aýanyń túngi temperatýrasy 0-5 gradýs jyly, 5-10 gradýsqa deiin túsedi», - dedi «Qazgidromet» RMK uzaq merzimdi aýa raiy boljamy basqarmasynyń basshysy Gúlmira Aqysheva Astanada ótken baspasóz máslixatynda.
Onyń aitýynsha, sáýirdiń ortasy men úshinshi onkúndiktiń orta sheninde Ortalyq Aziiadan keletin jyly aýa massalaryna bailanysty jyly kún raiy ornaidy. Soltústik aimaqtarda aýa temperatýrasy 15-23 gradýsqa deiin joǵarylasa, ońtústikte 20-28 gradýsqa deiin jylynady.
«Biraq sáýir aiynda aýa-raiy áli de aldamshy bolǵandyqtan, bundai jyly kúnder uzaqqa sozylmaidy. Úshinshi onkúndiktiń basynda jáne sońyna qarai kún raiy qaitadan sýyta túsedi. Elimizdiń soltústik aimaqtarynda jaýyn-shashyndy bolady. Túnde aýanyń temperatýrasy 0-den tómen, kúndiz 5-15 jylylyqty kórsetedi. Al ońtústik óńirlerde ótkinshi jaýyn jaýyp, naizaǵai kúrkireidi. Aýanyń túngi temperatýrasy 5-10 gradýs jyly, kúndiz 15-20 deiin kóteriledi», - dep atap kórsetti G.Aqysheva.
