Kásipkerler zańmen belgilengen kedendik tólemder men salyqtan jaltarýǵa tyrysty, - dep habarlaidy QazAqparat Memlekettik kirister komitetine silteme jasap.
Komitet taýarlardy jóneltýshi eldiń eksporttyq deklaratsiialarynan aqparatpen ózara almasý týraly halyqaralyq sharttardy jasasý boiynsha josparly jumys júrgizýde.
Naqty ýaqyt rejiminde taýarlardyń qunyn jáne olardyń jóneltýshi elde eksporty kezinde kórsetilgen sanyn Qazaqstannyń kedendik deklaratsiialarynda qazaqstandyq importtaýshylar málimdegen málimettermen salystyrý tetigi iske asyryldy.
Bul rette deklaranttardyń taýar týraly jalǵan aqparat jariialaý faktileri anyqtalyp otyr.
Máselen, osy jyldyń mamyr aiynda QHR-dan liýstra importtaldy. Deklarant partiianyń qunyn 11 myń dollar dep kórsetti.
Alaida Qytaidyń keden qyzmetinen aqparat suratylyp, olardyń málimeti boiynsha eksport kezinde bul júktiń quny 240 myń dollardy quraǵany anyqtalǵan.
Osylaisha, importtalǵan taýarlardyń quny 22 ese tómendetildi, al oryndalmaǵan salyq mindettemeleriniń somasy 25 mln teńgeni qurady.
QHR-nyń keden qyzmetiniń málimetterine sáikes, Qazaqstanǵa eksporttalatyn júkterdiń birinde «Smart-teledidar» taýary jóneltildi.
Alaida importtaýshy kedendik tólemderdi tóleýden jaltarý maqsatynda «televiziialyq qorap» taýaryn kórsetti.
Osyǵan orai kedendik saraptama júrgizilip, Qytaidan kelgen derekter rastaldy.
Júrgizilgen jumystyń arqasynda aǵymdaǵy jyldyń birinshi jartyjyldyǵynda jalpy somasy 15,8 milliard teńge taýardyń kedendik qunyn tómendetý faktileriniń joly kesildi, sondai-aq Qazaqstandaǵy import pen Qytaidan eksport arasyndaǵy aiyrmashylyq 1,4 milliard dollarǵa deiin tómendedi.
2017 jyly bul kórsetkish 6,8 milliard dollarmen 59% quraǵan.
Syrtqy ekonomikalyq qyzmettiń keibir qatysýshylary qabyldanǵan sheshimdermen kelispeitinin atap ótken jón.
Olar memlekettik kirister komitetiniń júrgizilip jatqan josparly jumysynyń bedelin túsirýge barynsha tyrysyp, zańdy túrde belgilengen tólemderdi tóleýden jaltaryp baǵýda.
Búgingi tańda komitet Qytaimen, Ázirbaijanmen, Grýziiamen, Ýkrainamen, Ózbekstanmen, Iranmen, Túrkimenstanmen jáne Túrkiiamen aqparat almasý týraly shart jasasty.
Sondai-aq tiisti kelisim jasasý úshin Tájikstan keden qyzmetimen kelissóz júrgizip jatyr.
Osy baǵyttaǵy jumys aldaǵy ýaqytta da jalǵasyn tabady.
