Foto: Pexels.com
Qazaqstanda 2025 jyldyń alǵashqy jartyjyldyǵynda saýda kólemi 8,4%-ǵa ósip, jalpy taýar ainalymy 31,4 trln teńgeni qurady. Bul týraly Úkimet otyrysynda Saýda jáne integratsiia ministri Arman Shaqqaliev málimdedi, dep habarlaidy Ult.kz.
Kóterme saýda 9,2%-ǵa ósip, 21,2 trln teńgege jetse, bólshek saýda kólemi 6,6%-ǵa artyp, 10,2 trln teńgege jetti. Saýda ósimi negizinen munai, gaz, turmystyq tehnika, farmatsevtikalyq ónimder men uialy telefondar siiaqty toǵyz negizgi taýar toby esebinen qamtamasyz etilgen. Jyl sońyna deiin bul taýarlar boiynsha ótkizý kólemi 26,4 trln teńgege jetýi múmkin.
Ministrdiń aitýynsha, saýda ósimine eń kóp úles qosqan óńirler – Almaty, Astana, Shymkent qalalary, Atyraý jáne Qaraǵandy oblystary. Al Túrkistan, Aqmola jáne Pavlodar oblystary saýda ósimi boiynsha kósh bastap tur.
Ministrlik saýda salasyn úsh baǵyt boiynsha damytýda: saýdanyń zamanaýi formattary, elektrondyq saýdany keńeitý jáne kóleńkeli ekonomikany azaitý. Biyl bul salaǵa 5,2 mlrd teńge bólinip, 168,4 mlrd teńgeniń investitsiialyq jobalary iske asyrylýda. Elektrondy saýda naryǵy 1,5 trln teńgege jetip, negizgi úlesti Kaspi.kz, Halyk market, Forte, Jusan, Ozon jáne Wildberries platformalary ielenip otyr.
Ekinshi jartyjyldyqta elimizde birneshe dark store jáne fýlfilment-ortalyqtar iske qosylmaq. Sonymen qatar Qytaimen B2B formatyndaǵy elektrondyq platforma ashý josparlanyp otyr.
Kóleńkeli saýdany azaitý maqsatynda ministrlik taýarlardy tańbalaý, katalogtaý jáne tsifrlandyrý jobalaryn júzege asyrýda. «Digital Bazar» sekildi bastamalar arqyly aqsha ainalymynyń ashyqtyǵy artpaq.
