Aqtóbede ádep jónindegi keńes Áiteke bi aýdandyq bilim bóliminiń basshysy Qanysh Jarymbetovke qatysty tártiptik isti qarady, dep habarlaidy "Ult aqparat".
Búgin oblystyq memlekettik qyzmet isteri janyndaǵy Ádep keńesi birneshe memlekettik qyzmetkerlerge qatysty tártiptik isti qarady. Áiteke bi aýdandyq bilim bóliminiń basshysy Qanysh Jarymbetov eń birinshi bolyp jaýap berdi.
«QR Sybailas jemqorlyqqa qarsy is-qimyl agenttiginiń Aqtóbe oblysy boiynsha departamenti E.Myrzabaevtyń aryzy negizinde Áiteke bi aýdandyq bilim bóliminiń basshysy Qanysh Jarymbetovke qatysty para alý faktisi boiynsha qylmystyq is qozǵalǵan. Aryzdy qaraý barysynda Q.Jarymbetov Áiteke bi aýdanynyń 22 mektebi pen 1 internatyna beinebaqylaý kamerasyn qondyrý kezinde 40 mln teńge jumsalatynyn, Memlekettik satyp alý konkýrsy kezinde jeńimpaz retinde taný jáne ári qarai qamqorshylyq tanytý úshin 7 000 000 teńge talap etkeni aityldy. Alaida qylmystyq is 2021 jyldyń 1-aqpany kúni qylmystyq quqyq buzýshylyq quramynyń bolmaýyna bailanysty toqtatyldy. «Whatsapp» jelisi arqyly hat almasý jazbalarynda E.Jarymbetov: «Ótkendegi bar degen degenin kerek», «Sen onda sheship daiyndap qoi», «Men ózim almaim», «Adam jiberem», «Men qolǵa almaim. Gospyn go», «Áńgime bolyp ketedi.Bere almasan srazý ait», «Qolyma tigende habar berem», «SMS oshir», «Maǵan telefonmen áńgime aitpa»; E.Mýrzabaev: «Qashanǵa? Bankten sheshý kerek, kansha?» «Ozine bere salaiyn», «Ortaǵa eshkimdi qospai». «Mende daiyn», «Qazir sheship qoiam» «Hattaǵy jazylǵan habarlama sol kúii berildi – red.) dep jazyp, keiin ony «Erkin kúres» sport kesheniniń aldyna saǵat 10:00-ge kezdesýge shaqyrǵan», - dedi oblystyq memlekettik qyzmet isteri departamenti memlekettik qyzmet salasyn baqylaý basqarmasynyń bas mamany Lázzat Qonaeva.
Ádep keńesi kezinde Áiteke bi aýdandyq bilim bóliminiń basshysy Qanysh Jarymbetov óz kinásin moiyndamady.
«Men – filologpyn. Meniń qate jazýym múmkin emes. Al maǵan kórsetilgen, men jazdy degen habarlamada qate kóp. Bul baǵyt boiynsha qylmystyq is toqtatyldy. Men óz kinámdy moiyndamaimyn», - dedi Qanysh Jarymbetov.
Ádep keńesi Áiteke bi aýdandyq bilim bóliminiń basshysyn jumystan shyǵarý túrindegi tártiptik jaza qoldaný týraly sheshim qabyldady.
