Respýblikalyq biýdjetten tolyq qarjylandyrylatyn bolsa, Almaty metrosynyń eki jańa beketi - Saryarqa jáne Dostyq 2021 jyldyń jeltoqsan aiynda paidalanýǵa beriledi, dep habarlaidy "Ult aqparat".
Almaty qalalyq mobildilik basqarmasynyń málimetinshi, ekinshi kezeńniń investitsiialyq quny - 67 922,38 mln teńge.
Jalpy, stansalar qurylysy bastalǵaly 63 278,28 mln teńge bólindi, onyń 52 629,58 mln teńgesi igerildi.
«2021 jylǵa arnalǵan bekitilgen biýdjet aiasynda 10 648,69 mln teńge bólindi, onyń 10 396,97 mln teńgesi respýblikalyq biýdjetten, qalǵany jergilikti biýdjetten qarastyrylǵan. Respýblikalyq biýdjetten tolyq qarjylandyrylatyn bolsa, «Saryarqa» jáne «Dostyq» stansalarynyń qurylysyn aiaqtaý biylǵy jyldyń jeltoqsanyna josparlanǵan» dep atap ótti basqarmadan.
Sonymen qatar, basqarmadaǵylar barlyq metro stansalary Wi-Fi testik rejimde iske qosylǵanyn atap ótti.
Qazirgi ýaqytta tonnelderge jáne elektr jyljymaly quramyna qondyrǵylar ornatý jumystary júrgizilýde.
2018 jyly «Hyundai Rotem» AQ-men metro vagondaryn satyp alý týraly kelisimge qol qoiyldy.
«Qazirgi ýaqytta metro poiyzynyń ekeýi jetkizildi. Qalǵan altaýy 2021 jyldyń birinshi jartyjyldyǵynyń sońyna deiin ákelinedi. 2018-2019 jyldary respýblikalyq jáne jergilikti biýdjeten 14 089,7 mln teńge (avanstyq jáne aralyq tólem) bólindi. 2021 jyly túpkilikti tólemdi júzege asyrý úshin respýblikalyq biýdjetti naqtylaýǵa 18 660,122 mln teńge ótinim jiberildi» dep habarlady qalalyq mobildilik basqarmasy.
