2019 jylǵy 27 jeltoqsanda «Saryarqa» magistraldyq gaz qubyrynyń qurylysy aiaqtalyp, paidalanýǵa berildi. Bul týraly QR Energetika ministrliginiń baspasóz qyzmeti málim etti, dep habarlaidy "Ult aqparat".
Qyzylorda oblysynan bastaý alǵan «Saryarqa» gaz qubyry elimizdiń elordasyn, ortalyq jáne soltústik óńirlerin otandyq kógildir otynmen qamtamasyz etýge múmkindik beredi.
«Nur-Sultan, Qaraǵandy, Temirtaý, Jezqazǵan qalalarynyń jáne gaz qubyry trassasynyń boiyna jaqyn ornalasqan 171 eldi mekenniń shamamen 2,7 mln turǵyny tabiǵi gazǵa qol jetkizedi. Atalǵan gaz qubyryn salý QR Tuńǵysh Prezidenti – Elbasy N. Á. Nazarbaevtyń «Bes áleýmettik bastama» atty Qazaqstan halqyna joldaýynyń aiasynda jáne «Saryarqa magistraldyq gaz qubyry qurylysyn ýaqtyly aiaqtaý týraly Memleket basshysy Q.K. Toqaevtyń «Igilik barshaǵa! Sabaqtastyq. Ádildik. Órleý» sailaýaldy baǵdarlamasy aiasynda júzege asyryldy. 2018 jyldyń jeltoqsan aiynda Elbasynyń qatysýymen ótken Telekópir barysynda gaz qubyrynyń qurylysyn bastaý rásimi ótti. Biylǵy qańtarda tehnika men adamdardy jumyldyrý, naýryz aiynda gaz qubyryn dánekerleý jumystary bastaldy. Qurylys barysynda 1 myńnan astam tehnika jáne shamamen 2 myń adam jumysqa tartyldy», - delingen ministrlik málimetinde.
Sonymen qatar, qurylys barysynda otandyq óndirýshiler barynsha jumyldyryldy. Bas merdiger – otandyq «QazQurylysServis» kompaniiasy. Ilmekti armatýra jáne kran toraptarymen jergilikti óndirýshi «Bemer Armatýren Qazaqstan» kompaniiasy, al avtomattandyrylǵan gaz taratý stantsiialarymen «Batys Munai Gaz jabdyqtary» kompaniialary qamtamasyz etti.
«Normativti merzimmen salystyrǵanda aitarlyqtai qysqa merzimde 1061,3 kilometr gaz qubyry, 5 birlik qýatty avtomattandyrylǵan gaz taratý stantsiiasy, sondai-aq gaz ólsheý stansasy salyndy. Bul jumystyń úilesimdiligin jáne bizdiń mamandarymyzdyń joǵary kásibi daiarlyǵyn, qurylys barysynda paidalanylǵan tehnologiialardyń innovatsiialyǵyn kórsetedi», - dep atalyp ótken habarlamada.
Tutastai alǵanda, jobany iske asyrý mýltiplikativti áser ákeletinin, shaǵyn jáne orta biznestiń damýyna, jańa jumys oryndarynyń paida bolýyna, sondai-aq gaz qubyry boiyndaǵy óńirler infraqurylymynyń damýyna serpin beretinin atap ótken jón.
