Elordanyń otyn-energetikalyq kesheni jáne kommýnaldyq sharýashylyq basqarmasynyń basshysy Erbol Tóleýov gaz taratý sharalary týraly aityp berdi, dep xabarlaidy QazAqparat tilshisi.
Onyń aitýynsha, gazdy aldymen jylý elektr stansalaryna tartý josparlanǵan. Sebebi búginde atalǵan nysandar ekologiiaǵa úlken ziian keltirip otyr. Máselen, JES-1 ábden tozǵan. Sebebi sonaý 60-shy jyldary salynǵan. Sol jerde mazýt jaǵatyn qazandyqtardy ózgertip, tabiǵi gazdy jaǵý josparlanyp otyr. "Sosyn Kóktal-1 men Kóktal-2-ge tartylady. Sebebi ol jerde kómirdi kóp jaǵady. Odan keiin Ońtústik-Shyǵys aýdannyń sol jaq jáne oń jaǵy, ary qarai Michýrino, Qyzyljar, Óndiris jáne taǵy basqa eldi mekenderge tartylady. Budan bólek, Qorǵaljynǵa qarai Ilinka men Úrker jaqqa ketedi", - dedi E.Tóleýov QR Parlament Májilisinde ótken "dóńgelek ústelde".
Basqarma basshysynyń sózine qaraǵanda, osy aida qurylys-montajdaý jumystary bastalady. "Biz ministrlikpen únemi bailanys ustap otyramyz. Sebebi gaz qubyry kelgende taratý jelileri daiyn turýy qajet", - dep atap kórsetti E.Tóleýov.
Aita keteiik, búgingi jiynda QR Energetika vitse-ministri Maǵzum Myrzaǵaliev "Saryarqa" gaz qubyrynyń qurylysy týraly aityp berdi.
"Saryarqa" gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan marshrýtymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabiǵi gazben qamtasyz etýge múmkindik bar. Árine, infraqurylymnyń salynýyna qarai gaz tutynatyn adamdardyń sany artady. Ótken jyly tamyz aiynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aiynda "Astana gaz" AQ men merdiger kompaniia - "Qazqurylysqyzmet" AQ arasynda tiisti kelisimshartqa qol qoiyldy. Qazirgi kezde barlyq qajetti texnika men mamandar tartyldy. Dánekerleý jumystary bastaldy. "Saryarqa" gaz qubyrynyń, shamamen, 1300 metri salyndy", - deidi M.Myrzaǵaliev.
