Túrkistan oblysy, Saryaǵash aýdanynda tórt ai buryn iz-túzsiz joǵalyp ketken zeinetkerdiń máiiti tabyldy. Egde jastaǵy ájeidi kórshisi ólgenshe uryp-soǵyp, denesin óz úiiniń aýlasyna kómip tastaǵany anyqtaldy, dep habarlaidy "Ult aqparat".
Oblystyq PD baspasóz qyzmetiniń málimetinshe, zeinetkerdiń ólimi boiynsha qylmysty anyqtaýǵa týystarynyń aryzy negiz bolǵan. Olar osy jyldyń maýsym aiynda politsiiaǵa Saryaǵash aýdanynyń bir aýylynda turatyn anasy jumbaq jaǵdaida joǵalyp ketkenin kórsetken. Atalǵan jait politsiia bóliminiń SDTBT-ǵa tirkelip, jedel-izdestirý is-sharalaryn júrgizgen.
Politsiia bóliminen kriminaldyq politsiia men tergeýdiń tájiribeli qyzmetkerlerinen arnaiy jedel-tergeý toby qurylyp, joǵalǵan zeinetkerdi izdestirý jumystaryna kriminalister men ýchaskelik inspektorlary da jumyldyrylǵan.
Joǵalǵan áieldiń jalǵyz turatynyn eskergen jedel ýákilder onyń barlyq tanystaryn, sondai-aq sońǵy ýaqytta kimdermen qarym-qatynas jasaǵanyn anyqtaǵan. Nátijesinde qart ananyń kisi óltirýdiń qurbany bolýy múmkin degen boljam da jasalǵan. Tek tórt aidan keiin ǵana kriminaldyq politsiia qyzmetkerleri zeinetkerdiń joǵalýyna qatysy bar kúdiktiniń izine tústi. Ol jábirlenýshiniń kórshisi bolyp shyqty.
«Kúdikti zeinetkermen kórshi úide turǵan, Qazyǵurt aýdanynyń turǵyny ekeni anyqtaldy. Onyń sózinshe, zeinetker áiel ekeýiniń arasynda qaryz saldarynan janjal týyndaǵan. Janjal barysynda kúdikti áieldi ólgenshe uryp-soǵyp, denesin óz úiiniń aýlasyna kómip tastaǵan. Politsiia qyzmetkerleri iz-túzsiz joǵalǵan adamnyń máiitin kómilgen jerinen taýyp, ony saraptamaǵa jiberdi.
Qazirgi ýaqytta atalǵan jait boiynsha QR QK 99-baby «Adam óltirý» boiynsha sotqa deiingi tergeý amaldary júrgizilýde. Kúdikti qamaýǵa alynyp, sot-meditsinalyq saraptama taǵaiyndaldy. Politsiia qyzmetkerleri bolǵan qylmystyń barlyq mán-jaiyn anyqtaýda», delingen habarlamada.
