Jetisý oblysynyń Sarqan aýdanynda qoqystan basy bir bólek, denesi bir bólek kúiinde tabylǵan 5 jastaǵy qyzdy óltirgen anasy men naǵashy aǵasy sottaldy. Búgin olarǵa sot úkimi shyǵyp, árqaisysy 15 jylǵa temir torǵa qamaldy, - dep habarlaidy QazAqparat agenttigi.
Esterińizge sala keteiik, osydan 7 ai buryn Sarqan qalasynyń shetindegi qoqystan 5 jastaǵy qyzdyń múrdesi tabylǵan bolatyn. Arýjan esimdi qyzdyń máiiti qoqysta 3 ai boiy jatqany belgili boldy. Qur qańqasy ǵana qalǵan balanyń máiitin dalada oinap júrgen balalar taýyp alǵan.
Anyqtalǵandai, qyzdy týǵan anasy men naǵashy aǵasy qylqyndyryp óltirip, qoqysqa tastap ketken. Al óltirilgen balany anasy 14 jasynda bosanypty. Ony sol kezde aǵasy zorlap, júkti bolyp qalǵan.
Qazir 20 jastaǵy anasy úshinshi balasyna aiaǵy aýyr. Endi ol bul sábiin temir torda dúniege ákeledi. Aita keteiik, sottalyp jatqan Aqniet pen Aqtilek - týǵan aǵaiyndy. Olardyń ata-anasy qaitys bolǵan.
«Jas balany óltirý faktisi boiynsha naǵashy aǵasy men sheshesine qatysty sot úkimi jariialanyp, olarǵa 15 jyldan basbostandyǵynan aiyrý jazasy taǵaiyndaldy. Tolyǵyraq aityp ketetin bolsaq, balanyń naǵashy aǵasy men sheshesi aldyn ala sóz bailasý arqyly jas balany óltirip, denesin qoqys alańyna qaltyryp ketken. Sot otyrysynda olar óz kinálaryn moiyndady», - dedi Jetisý oblystyq sotynyń resmi ókili Nursultan Orynbasarov.
