IIM júiesinde kezekti ret ashyq kadrlyq taǵaiyndaýlar ótti. Vedomstvo basshylyǵy politsiia basqarmalarynyń basshylary, politsiia departamenti bastyǵynyń jáne Ulttyq ulannyń Bas Qolbasshysy orynbasarlary laýazymdaryna úmitkerlerdi qarady, - dep habarlaidy Polisia.kz saity.
Usynylǵan kandidattardyń árqaisysy jeke qaraldy. Aita ketý kerek, taǵaiyndaýdyń bul formaty úzdikterdi anyqtaýǵa jáne olardyń jumysyn laiyqty túrde baǵalaýǵa múmkindik beredi.
Ministr jáne onyń orynbasarlary birinshi kezekte Qazaqstan Respýblikasy Ulttyq ulany Bas Qolbasshysynyń orynbasary qyzmetine “Halyq qaharmany” Qairat Úmbetovtiń kandidatýrasyn qarady.
“Ózderińiz kórip otyrsyzdar, ol búkil satyny ótti. Bizdiń ulandarǵa durys tárbieni “Halyq qaharmany” bermese, basqa kim beredi? Qairat Jarylqasynuly, ulandyqtardyń moraldyq-psihologiialyq jaǵdaiyn shyńdap, sarbazdarmen tárbie jumystaryn júrgizý qajet. Sizdiń erligińiz olarǵa úlgi bolady dep oilaimyn. Bul taǵaiyndaýmen biz Ulttyq ulandy nyǵaitamyz dep úmittenemin”, – dedi ministr Marat Ahmetjanov.
Eske sala keteiik, 2016 jyly Qaraǵandy quramasynyń oqý ortalyǵynda jattyǵýdy oryndaý kezinde jarylǵan jaýyngerlik granatadan polkovnik sarbazdy óz denesimen jaýyp, qutqaryp qalǵan bolatyn.
Sondai-aq ishki ister ministriniń buiryǵymen:
- Nur-Sultan qalasy Politsiia departamenti bastyǵynyń orynbasary laýazymyna Qýanysh Orynbetov;
- Pavlodar qalasy Politsiia basqarmasynyń bastyǵy laýazymyna Ermek Áljanov;
- Shymkent qalasy Eńbekshi aýdandyq Politsiia basqarmasynyń bastyǵy laýazymyna Almas Ámzeev taǵaiyndaldy.
