Saraishyq qalashyǵynyń mańynda Qasym hanǵa monýmentaldy eskertkish ornatylady. Bul jaiynda QR Premer-Ministri Asqar Maminniń Májilis depýtattaryna bergen jaýabynda aitylǵan, - dep habarlaidy "Ult aqparat".
Aita keterligi, Premer-Ministrge resmi saýal joldaǵan depýtattar Saraishyq qalashyǵyna arnalǵan Úkimettiń arnaiy keshendi sheshim qabyldaýyn suraǵan bolatyn.
Atalǵan saýalǵa jaýap bergen Úkimet basshysy «Saraishyq» memlekettik tarihi-mádeni murajai-qoryǵy» RMQK qyzmetin qamtamasyz etýge respýblikalyq biýdjetten 52,2 mln teńge qarastyrylǵanyn aitady. Sondai-aq mýzei-qoryq kórsetiletin aqyly qyzmetten túsken tabysty belgilengen tártippen qyzmetti damytýǵa paidalanady. Saraishyq qalashyǵyn konservatsiialaý men qalpyna keltirýdi qamtamasyz etý úshin 2020-2022 jyldarǵa arnalǵan respýblikalyq biýdjet jobasynda 58 mln teńge jáne mýzei-qoryqtyń qyzmetin qamtamasyz etýge 163,1 mln teńge qarastyryldy. Munan bólek Mádeniet jáne sport ministrligine 2020-2022 jyldarǵa arnalǵan respýblikalyq biýdjetti naqtylaý kezinde mýzei-qoryqtyń materialdyq tehnikalyq bazasynyń máselelerin qosymsha qaraý tapsyryldy.
«2020 jyly respýblikalyq deńgeide Altyn Ordanyń 750 jyldyǵyn merekeleý josparlanyp otyr. Osyǵan bailanysty 2020 jylǵa arnalǵan tiisti jospar jobasy ázirlendi. 2019 jylǵy 10-11 qazanda mýzei-qoryqta Túrkiia, Resei, Qytai, Germaniia elderiniń otandyq jáne sheteldik ǵalymdarynyń qatysýymen «Joshy ulysy jáne Saraishyq-Qazaq memlekettiliginiń bastaýynda» atty halyqaralyq ǵylymi-tájiribelik konferentsiia ótti. Osy is-shara aiasynda Mýzei-qoryqtyń virtýaldy nusqasy tanystyryldy. Kelesi jyly mýzei-qoryqta Kerýen saraidyń, ortaǵasyrlyq Saraishyq qalashyǵy tsitadeliniń qaqpasyn qalpyna keltirý jáne Saraishyq qalashyǵynyń mańynda Qasym hanǵa monýmentaldy eskertkish ornatý siiaqty is-sharalar ótkizý josparlanýda», - dep atap ótedi Úkimet bashysy.
A.Maminniń atap ótinshe, qazirgi ýaqytta ǵylymi-restavratsiialaý jumystaryn júrgizýge ǵylymi-jobalaý qujattamasy ázirlenip jatyr. Sondai-aq 2020 jyly ortaǵasyrlyq Saraishyq qalashyǵynyń qorǵaý aimaqtaryn anyqtaý boiynsha jumystar júrgiziletin bolady.
«Budan basqa, 2020 jyly respýblikalyq jáne óńirlik BAQ-tarda ataýly kúndi mindetti túrde aqparattyq súiemeldeý josparlanyp otyr. Atalǵan is-sharalar mýzei-qoryqtyń qyzmetin jandandyrýǵa baǵyttalǵan. Osyǵan bailanysty Saraishyq mýzei-qoryǵyn damytýǵa arnalǵan Úkimettiń jekelegen keshendi sheshimin ázirleý jáne qabyldaý orynsyz», - dedi Premer-Ministr.
