Saraptamaǵa jiberiletin oqýlyqtardyń avtorlary tolyǵymen jasyryn bolady. Bul jaiynda QR Premer-Ministri Asqar Maminniń Senat depýtattarynyń saýalyna bergen jaýabynda aitylǵan, dep habarlaidy QazAqparat.
«Oqýlyq avtorlaryn oqytý aiasynda ǵylymi terminologiiany qoldanýdyń biryńǵai tásilin paidalanýǵa erekshe kóńil bólinedi. Búgingi kúni Mádeniet jáne sport ministrligi janynan terminologiialyq jumys toby quryldy, ol latyn álipbiine kóshý kezinde terminologiialyq qordy rettep, terminologiialyq erejelerdi qalyptastyrý boiynsha jumys júrgizetin bolady. Osyǵan bailanysty Bilim jáne ǵylym ministrligi oqýlyqtardy ázirleý kezinde terminologiiany paidalaný boiynsha usynystardy pysyqtaýda», - dedi Premer-Ministr.
Asqar Maminniń atap ótinshe, Oqýlyqtardy daiyndaý jáne saraptama ótkizý jónindegi jumysty uiymdastyrý qaǵidasynda úzdik álemdik tájiribeni eskere otyryp, oqýlyqtarǵa saraptama ótkizý jáne olardy irikteý rásimine, sarapshylardyń biliktilik deńgeiine qoiylatyn talaptar qatańdatyldy. Oqýlyqtar men oqý-ádistemelik keshenderdiń ǵylymi jáne pedagogikalyq saraptamasyn sarapshylardyń avtomattandyrylǵan derekter bazasyna engizilgen jáne konkýrstyq irikteýden ótken ǵalymdar men pedagogtar qatarynan qalyptastyrylatyn saraptama komissiiasy júrgizedi.
«Saraptamany ótkizý qupiialylyq rejimine aýystyryldy, iaǵni saraptamaǵa jiberiletin oqýlyqtardyń avtorlary tolyǵymen jasyryn bolady. Bul shara saraptamanyń obektivtiligi men sarapshylardyń beitaraptyǵyn qamtamasyz etýge baǵyttalǵan. Sondai-aq qaǵidada oqýlyqtardy mindetti túrde synaqtan ótkizý qarastyrylǵan», - dedi ol.
Onyń atap ótýinshe, jurtshylyqtyń barlyq eskertýleri men usynystary oqýlyqtardy ázirleý men saraptama ótkizýdi normativtik qamtamasyz etýdi jetildirý úshin qurylǵan qoǵamdyq-saraptamalyq ashyq alańda talqylanatyn bolady.
«Budan basqa, «Orta bilim berýdi jańǵyrtý» jobasy aiasynda oqýlyqtardyń sapasyn arttyrý maqsatynda Dúniejúzilik bank qarajaty esebinen árbir jeke pán boiynsha oqýlyqtarǵa qoiylatyn talaptardy jańartý, olardy baǵalaý ádistemesi men kriteriilerin jetildirý kózdelgen. Eki myń sarapshy men 40 jattyqtyrýshyny oqytý josparlanýda», - deidi Asqar Mamin.
