Koronavirýstyń delta variantynyń jyldam taraýy jáne vaktsinalaý naýqanynyń baiaý júrýi álemde koronavirýs indetin qaita órshitti. Densaýlyq saqtaý salasynyń sarapshylary osylai dep málimdedi. Kolýmbiia, Indoneziia, Ulybritaniia, Ispaniia men AQSh-tyń árqaisysynda kún saiyn shamamen 30 myń tóńireginde naýqas tirkelip jatyr. Mamandar halyqty vaktsina alýǵa úgitteelt. Sarapshylardyń aitýynsha, koronavirýs kóbine vaktsinalaý naýqany baiaý júrip jatqan aimaqta órship otyr, dep jazady Azattyq.
11 shildede AQSh-ta shamamen 23 600 adamnan koronavirýs anyqtaldy. Bul maýsym aiynyń sońyndaǵy kórsetkishten eki esege kóp. Degenmen qańtar aiynda AQSh-ta vaktsinalaý naýqany bastalmai turǵanda kúnine 250 myń naýqas tirkelgen. Resmi oryndar halyqqa koronavirýstyń jyldam juǵatyn delta variantynyń jyldam tarap jatqanyn eskertti. 13 shildede Los-Anjeleste qatarynan bes kún myńnan astam naýqas tirkelgen.
Ózge elderde de delta varianty jyldam tarap jatyr. Indoneziiada 13 shildede 47 899 adamnan koronavirýs anyqtaldy. Bul buryn-sońdy tirkelmegen eń joǵary kórsetkish. Aýrýhanalarǵa qatty salmaq túsip, ottegi jabdyqtary taýsylǵan. Keibir adamdar aýrýhanada oryn bolmaǵandyqtan koronavirýs juqqan týystary men dostaryn úide qarap, óz betinshe emdep jatyr.
Ortalyq Aziiada, onyń ishinde Qazaqstan men Qyrǵyzstanda da virýs kúsheigen. 13 shildede Qazaqstanda 4500-den astam adamnan koronavirýs anyqtaldy. Bul byltyrdan beri tirkelgen rekordtyq kórsetkish. Dúisenbi kúni elde 59 adam Covid-ten qaitys boldy. Ótken aptadan beri koronavirýstyń rekordtyq kórsetkishi qatarynan birneshe kún úzdiksiz jańaryp keledi. Nur-Sultanda naýqastar syimaǵandyqtan qonaqúi, túrli keshender koronavirýs juqtyrǵandardy qabyldaityn statsionarǵa ainalyp jatyr. Qazaqstanda 2,5 mln adam koronavirýsqa qarsy vaktsina alǵan. Biraq elde vaktsinaǵa senbeitinder áli de kóp. Vaktsinanyń jalǵan pasportyn satyp alýshylar týraly málimet jiiledi.
Qyrǵyzstanda 13 shildede 1400-ge jýyq naýqas tirkeldi. Ministrlik buǵan deiin elde koronavirýstyń "úshinshi tolqyny" bastalǵanyn aitqan.
