Prezidenttiń keshegi Joldaýy eldi pandemiialyq jaǵdaidan shyǵarý jospary. Joldaýda pandemiia kezindegi basty túitkilder qaralǵan. Joldaýǵa qatysty osy jáne ózge de oiyn «Rýhani jańǵyrý» qoǵamdyq damý institýty Qoǵamdyq protsesterdi zertteý ortalyǵynyń jetekshisi Qazbek Maigeldinov ortaǵa saldy, dep habarlaidy QazAqparat.
«Joldaýda kópshilik kútken jait, halyqtyń ál-aýqatyn arttyrý. Ózderińiz bilesizder, pandemiia kezinde eldiń áleýmettik jaǵdaiy eń túiitkildi máseleniń biri boldy. Ol degenimiz kóp balaly analardyń talaby, jumyssyzdyq jáne shaǵyn jáne orta biznes máseleleri taǵy sol siiaqty. Osy túiitkilderdi Prezidenttiń nazarda ustaǵany kórinip tur. Bul jolǵy Joldaý pandemiiadan sabaq alyp, endi odan shyǵý jospary. Naqty toqtalsaq, byltyr pandemiia kezinde búkil el bolyp talqylaǵan 42 500 teńge, endi 60 myńǵa jetip otyr. Prezident dárigerler men muǵalimderdiń eńbegin baǵalaý kerektigin únemi aitady, nátijesinde olardyń jalaqysy kóterildi», - dedi Qazbek Maigeldinov.
Onyń aitýynsha, Memleket basshysy eldiń aldaǵy damý jolyn kórsetti endigi maqsat ony halyqqa túsindirý men oryndaý.
«Prezident aiqyndaǵan taǵy bir jait, azamattyq qyzmetshilerdiń eńbekaqysyn kóterý. Halyq úshin jasalyp kelesi múmkindiktiń biri - zeinetaqy jinaǵynyń belgili bir bóligin Otbasy bankindegi depozitke aýdarý. Bul óte mańyzdy, sebebi osyǵan deiin bolǵan «Baspana-hit», «7-20-25» turǵyn úi baǵdarlamalary óz máresine jetip otyr. Demek jańa múmkindik kerek. Meni qýantqan kelesi másele eńbek naryǵyn retteý. Qazirgi tańda kóleńkeli ekonomikada jumys istep jatqan jaldamaly jumysshylardyń qatary az emes. Ony zańdastyrý kerek, birinshiden jalaqysy tómen, ekinshiden olarǵa qandai eńbek talaby qoiylyp jatqanyn eshkim bilmeidi. Halyqty jii mazalaityn azyq-túlik baǵasynyń turaqsyzdyǵyn da Memleket basshysy basa aityp ótti» , - deidi ol.
Sondai-aq, sarapshy Prezident Joldaýda júktegen tapsyrmaǵa Úkimet búginnen kirisý kerek degen oiyn alǵa tartty.
