QR Sybailas jemqorlyqqa qarsy is-qimyl agenttigi tóraǵasynyń keńesshisi Anar Jarova sybailas jemqorlyqqa qarsy zańnamany jetildirýge qatysty pikir bildirdi, dep habarlaidy QazAqparat.
«Sońǵy jyldyń ózinde ǵana sybailas jemqorlyqqa qarsy is-qimyl máseleleri boiynsha zańnamalyq ózgeristerdiń úsh toptamasy ázirlendi, olardyń ekeýi búgingi kúni iske asyryldy. Birinshisi ótken jyldyń sońynda qabyldandy, onda baǵynysty qyzmetkerlerdiń sybailas jemqorlyq úshin basshylardyń otstavkasy jáne tártiptik jaýapkershiligi týraly normalar engizildi. Normativtik quqyqtyq aktiler jobalarynyń sybailas jemqorlyqqa qarsy saraptamasy qalpyna keltirildi, sybailas jemqorlyq týraly habarlaǵany úshin azamattardy kótermeleýdiń saralanǵan júiesi engizildi», - dedi A. Jarova dedi onlain brifingide.
Onyń aitýynsha, barlyq osy mehanizmder ózderin tiimdi aldyn alý quraldary retinde kórsetti. Sybailas jemqorlyqqa qarsy normalardyń ekinshi paketi biylǵy 6 qazandaǵy zańmen qabyldandy. Onda syilyqtardy syiǵa tartýǵa jáne alýǵa tolyq tyiym salý, jaqyn týystarynyń birlesken jumysyn shekteý arqyly sybailas jemqorlyqqa qarsy shekteýler kúsheitildi. Mundaǵy sharalardyń mańyzdy blogy kvazimemlekettik sektordaǵy sybailas jemqorlyqqa qarsy is-qimyl máselelerin quqyqtyq retteýge baǵyttalǵan.
«Osylaisha, zańnamalyq sharalardyń úshinshi paketin keshe ǵana Parlament Senaty eki oqylymda qabyldady jáne Prezidenttiń biylǵy 1 qyrkúiektegi Qazaqstan halqyna Joldaýynda aitylǵan tapsyrmalardy iske asyrý úshin júrgizilýde. Ázirlengen túzetýler sybailas jemqorlyq úshin jaýapkershilikti kúsheitýge baǵyttalǵan», - dedi tóraǵa keńesshisi.
Onyń sózine qaraǵanda, iske asyrylyp jatqan sybailas jemqorlyqqa qarsy saiasatqa halyqtyń pikiri mańyzdy bastama boldy.
Eske sala keteiik, 10 jeltoqsanda Senattyń jalpy otyrysynda «Qazaqstan Respýblikasynyń keibir zańnamalyq aktilerine qylmystyq protseste azamattardyń quqyqtaryn qorǵaýdy jáne sybailas jemqorlyqqa qarsy is-qimyldy kúsheitý máseleleri boiynsha ózgerister men tolyqtyrýlar engizý týraly» Zańy eki oqylymda qaralyp, qabyldandy.
«Sybailas jemqorlyqqa qarsy is-qimyl týraly» zańda jaýapty memlekettik laýazymdy atqaratyn adamdar jáne memlekettik fýnktsiialardy oryndaýǵa ýákilettik berilgen adamdar (máslihattar depýtattaryn qospaǵanda) men laýazymdy tulǵalar úshin sheteldik bankterdegi shottarǵa ielik etýi boiynsha sybailas jemqorlyqqa qarsy jańa shekteý engizý kózdelgen.
