«Qazaqstandyq atom elektr stantsiialary» JShS bas direktory Timýr Jántikin shaǵyn modýldi atom reaktorlarynyń keleshegi týraly pikir bildirdi, dep habarlaidy QazAqparat.
«Iadrolyq tehnologiia jetkizýshilerdiń arasynda saýalnama júrgizgen bolatynbyz. Olar aldyn ala tehnikalyq-kommertsiialyq usynystaryn berdi. Sol usynys boiynsha qarjylyq-ekonomikalyq modelderin de kórsetti. Osy arqyly usynylǵan jobalardy iske asyrý nusqalary esepteldi. Iaǵni, bul joba elektr tarifine qalai áser etetinin, shyǵyny qalai aqtalatynyn zerttedik. Tehnologiia men ekonomika boiynsha aldyn ala jumys júrgizildi. Qazir sol kezdegi ólshemderdi qaita naqtylap jatyrmyz. Óitkeni biz esep júrgizgen kezden beri 3 jyl ótti. Bul ýaqyttyń ishinde tehnologiia alǵa uzap ketti», - dedi sarapshy.
Sondai-aq, ol keibir mamandar Qazaqstannyń energetika júiesine qoldaný qolaily dep júrgen shaǵyn modýldi atom reaktorlarynyń keleshegi týraly paiymyn aitty.
«Ondai reaktorlardy da qarastyryp jatyrmyz. Bul parallel joba deýge bolady. Shartty túrde «shaǵyn modýldi reaktorlar» dep ataidy. Bul da Qazaqstanda iske asýy múmkin, keleshegi bar baǵyttardyń biri. Onyń da alǵashqy esep-qisabyn jasaǵanyz. Tehnika jaǵynan da, ekonomika jaǵynan da keleshegi bar ekenin kórsetip otyr. Biraq bul keleshektiń enshisinde. Óitkeni dál qazir naryqta ondai daiyn reaktorlar joq. Degenmen birneshe joba iske sarylyp jatyr. Naqtylap aitsaq, Amerika qurama shtattarynda 2 joba eldegi iadrolyq komissiianyń maquldaýynan ótip úlgerdi. Onyń biri Kanadada, endi biri AQSh-tyń ózinde iske asyrylyp jatyr. Qazir olarmen de jumys istep jatyrmyz. Biz bul baǵyttyń da keleshegi jaqsy dep esepteimiz», - dedi Timýr Jántikin.
