Elektr qýaty tarifiniń kóterilýine ne sebep bolǵany jóninde energetika jónindegi sarapshy, ekonomika ǵylymdarynyń kandidaty Álisher Qurbanáliev pikir bildirdi, dep habarlaidy QazAqparat.
Aita keteiik, Energetika ministrligi elektr energiiasyna arnalǵan tarifterdi kóterý týraly buiryǵynyń jobasyn jariialady. Qujat naýryzdyń 26-syna deiin talqylaýǵa shyǵaryp otyr. Osyǵan orai energetika jónindegi sarapshy atalǵan buiryqqa qatysty túsindirme berdi.
«Elektr energiiasy – bul elektr óndiretin stansalar satatyn jalǵyz taýar. Kez kelgen óndirýshi ónimin satyp, túsken kiris esebinen óziniń barlyq shyǵyndaryn jabýǵa tyrysady. Oǵan óndiristik shyǵyndar, onyń ishine jumysshylardyń jalaqysy, shyǵyndalatyn materialdar, otyn kiredi. Bul stansa jumysynyń odan ary jalǵasýynyń negizi sanalady», - dedi sarapshy.
Onyń atap ótýinshe, kez kelgen jabdyqty jańartý, jóndeý jáne aýystyryp otyrý qajet. Óitkeni elimizdiń elektr energetika nysandary Keńes odaǵy zamanynan qalǵan ári eskirgen.
«Kez kelgen jabdyqty jańartyp, jóndep, aýystyryp otyrý kerek. Qajetti deńgeige deiin tariftiń kóterilmeýi saldarynan stansalar qajetti jóndeý jumystaryn júrgize almai otyr. Energetikter úiimizde sham sónip qalmaýy úshin elektr energiiasymen senimdi ári sapaly qamtamasyz etýge mindetti. Biraq, olar qyzmetkerlerine jalaqy tóleý, agentterge kelisimshart boiynsha tólem jasaý úshin qarajatyn únemdeýge, basqa da joldaryn únemi izdeýge májbúr. Olar jóndeý jumystaryn júrgizip úlgermei jatyr. Sondyqtan tarifti kóterý stansalarǵa atalǵan is-sharalardy atqarý úshin qajet», - dedi ol.
Sonymen qatar ol elektr energiiasyna tarif kóterilgennen keiin osy aidyń ishinde, nemese osy jylda elimizdiń barlyq elektr energetikasy jańartylady deýge kelmeidi.
«Tipti, qarapaiym týrbinanyń ózin aýystrý úshin ony jobalaýǵa birneshe ai ketedi. Iaǵni, jumys istep turǵan trýbinany jańasyna aýystyrýǵa jarty jyl merzim qajet bolady», - dedi sarapshy.
Sarapshy elektr energiiasy tarifiniń kóterilýinen ne kútýge bolatyndyǵyna qatysty da pikirimen bólisti.
«Eger tarif kóterilse, onda jumysshylardyń da jalaqysy qazirgiden jyldam arta túsedi. Ekinshiden, qural-jabdyqtardyń tozýyn tejei alamyz. Iaǵni, qural-jabdyqtar sapasy jaqsara túsedi. Osynyń arqasynda jańa stansalar paida bolyp, tolyqtai jańǵyrtylý júrgiziledi deýge kelmeidi. Oǵan qarajat ta jetpeidi. Jańa qural-jabdyqtar salyp, eskisin aýystyrý úshin tarifti eki ese kóterý qajet. Al bul turǵandar, kásiporyn úshin úlken júkteme. Tarifti birtindep kóterý kem degende qazirgi ýaqytta qoldanystaǵy qural-jadbyqtardyń jai-kúiiniń nasharlaýyn tejeitindigi sózsiz», - dedi Álisher Qurbanáliev.
