Foto: Facebook / Aisultan Jaqypov
Saran turǵyny tankke Z belgisin qoiǵany úshin jeti táýlikke qamaldy, - dep habarlaidy Tengrinews.kz agenttigi.
Ákimshilik quqyqbuzýshylyq týraly materialdy Saran qalalyq soty qarady. Quqyq buzýshyǵa ÁQBtK-niń 434-baby "usaq buzaqylyq, iaǵni turǵyn úi-jailardy búldirý jáne ainalasyna qurmetsizdik bildiretin, qoǵamdyq tártip pen jeke adamdardyń tynyshtyǵyn buzatyn basqa da osyndai áreketter" boiynsha aiyp taǵylǵan.
"Ákimshilik quqyq buzýshylyq týraly materialdy Saran qalasynyń politsiia bólimi daiyndady. 29 shilde saǵat 04:11 shamasynda quqyq buzýshy qoǵamdyq jerde, atap aitqanda, Uly Otan soǵysynyń batyrlaryna arnalǵan orynda tank eskertkishiniń munarasyn Z belgisimen boiaǵan. Sot 7 táýlik merzimge ákimshilik qamaýǵa alý túrinde jaza qoldaný týraly qaýly shyǵardy", - dep habarlady Saran qalalyq sotynyń baspasóz qyzmeti.
Sondai-aq ÁQBtK-niń 434-baby 1-bóliginiń sanktsiiasy 5 AEK mólsherinde aiyppul salýdy nemese 10 táýlikke deiingi merzimge ákimshilik qamaýǵa alýdy kózdeidi.
Sot qaýly shyǵarǵan kezde kináliniń jeke basyn, quqyq buzýshylyq jasalǵanǵa deiingi jáne odan keiingi minez-qulqyn, kinásin moiyndaýyn jáne jasaǵan áreketine ókinýin, jaýaptylyqty aýyrlatatyn mán-jailardyń bolmaýyn eskerdi.
