Búgin Jer reformasy jónindegi komissiianyń birinshi otyrysynda Aýyl sharýashylyǵy ministri Saparhan Omarov jaiylymdardy paidalanýǵa qatysty túsinik berdi, dep habarlaidy QazAqparat.
«Jergilikti halyqtyń muqtajdyqtaryn qanaǵattandyrý úshin jaiylymdar berý máselelerin sheshý maqsatynda «Jaiylymdar týraly» Qazaqstan Respýblikasynyń Zańy qabyldandy, onyń aiasynda 2 jyldyq merzimge jaiylymdardy basqarý jónindegi josparlardy ázirlep, bekitý kózdeldi. Bul josparlar halyqtyń mal jaiýyn qamtamasyz etý úshin uiymdastyrylǵan sharýashylyqtardyń júktelmegen jaiylymdaryn qaita bólýge baǵyttalǵan. Bul rette, jaiylymdardy berý men paidalanýǵa bailanysty is-sharalardy júrgizý kezinde jariialylyqty qamtamasyz etý úshin Jaiylymdardy basqarý men olardy paidalaný josparyn ázirleýge jergilikti ózin-ózi basqarý organdaryn qatystyrý zańnama júzinde kózdeldi. Jergilikti ózin-ózi basqarý organdary jergilikti atqarýshy organdardyń jaiylymdardy paidalaný jónindegi jyl saiynǵy esepterin tyńdap, talqylaidy, jaiylymdardy qaita bólý máselesin qaraýǵa, Jaiylymdardy basqarý josparyn iske asyrýǵa qatysady, sondai-aq jaiylym paidalanýshylarmen, jaiylym paidalanýshylar birlestikterimen jaiylymdardy basqarý jáne paidalaný máseleleri boiynsha ózara is-qimyl júrgizedi», - dedi ministr.
Osy oraida ol 2015 jyldan bastap paidalanylmaityn jerlerdiń anyqtalýyn memlekettik baqylaý fýnktsiialaryn jergilikti atqarýshy organdar júzege asyratynyn eske saldy.
Budan buryn habarlanǵandai, Saparhan Omarov aýyl sharýashylyǵy jerlerin tiimdi jáne utymdy paidalaný máseleleri boiynsha júrgizilip jatqan jumystar týraly baiandady.
