Aýyl sharýashylyǵy ministri Saparhan Omarov shujyq ónimderin óndirý 100 paiyzǵa qashan jetkiziletinin aitty, dep habarlaidy QazAqparat.
«Jańa aýlanǵan, salqyndatylǵan jáne muzdatylǵan balyq óndirý kólemi 3 jyl ishinde 4 paiyzǵa ulǵaiyp, 27,4 myń tonnany qurady. Qamtamasyz etilý kólemi 61 paiyz deńgeiinde.
Qazirgi ýaqytta balyq ósiretin (akvaósirý) 5 kásiporyn bar, sondai-aq balyq óńdeýshi kásiporyndar qýaty 10 myń tonnaǵa ulǵaityla otyryp, iske asyrylý jáne jańǵyrtylý satysynda tur. Munda 44 myń tonna balyq pen balyq ónimi óndiriletin bolady», - dedi ministr Parlament Májilisindegi Úkimet saǵatynda.
Onyń sózine qaraǵanda, tushy sý balyǵymen qamtamasyz etilý deńgeii jalpy qalypty jaǵdaida, alaida negizinen balyqtardyń teńizde ósetin túrleri ákelinedi. Olar taýarly balyq sharýashylyǵynda (akvaósirý) ósirilmeidi.
Ministrlik málimetine qaraǵanda, shujyq ónimderin óndirý kólemi 3 jyl ishinde 21 paiyzǵa (44,3 myń tonnadan 53,7 myń tonnaǵa deiin) ulǵaidy. Elimizde óndirilgen shujyq ónimderimen qamtamasyz etilý kólemi 62 paiyzdy qurady. 2020 jyly qýaty 45 myń tonnaǵa ulǵaitylatyn 3 et óńdeýshi kásiporyn iske asyrylý satysynda tur, bul qamtamasyz etilý kólemin 2021 jylǵa qarai 70 paiyzǵa deiin, 2024 jylǵa qarai 100 paiyzǵa deiin arttyrýǵa múmkindik beredi.
