Búgin Parlament Senatynyń jalpy otyrysynda Aýyl sharýashylyǵy ministri Saparhan Omarov astyq baǵasynyń ósýine birqatar faktor yqpal etetinin aitty, dep habarlaidy QazAqparat.
«Ótkende Úkimet otyrysynda qambaǵa 19 mln tonna astyq quiyldy dep málimdedińiz. Biraq beiresmi sarapshylardyń, diqandardyń jáne ózge de mamandardyń pikiri boiynsha bul kórsetkish anaǵurlym tómen degen málimet aitylýda. Oǵan dálel retinde qazir astyqqa baǵa kún saiyn ósip bara jatyr», - dedi senator Murat Baqtiiaruly QR Aýyl sharýashylyǵy ministri Saparhan Omarovqa qarata aitqan sózinde.
Óz kezeginde ministr astyq shyǵymy boiynsha atalǵan málimet óńirlerden jiberilgen aqparatqa súiene otyryp jariialanǵanyn atap ótti.
«19,1 mln tonna astyq jinaldy dep aitylǵan málimet jedel aqparat negizinde jariia etildi. Bul aqparatty biz ár oblystaǵy aýyl sharýashylyǵy basqarmalarynyń bergen málimeti boiynsha aldyq. Budan basqa, biyldan bastap bizde ónim kólemin tekserý úshin ǵaryshtyq monitoring qoldanylýda. Sonyń aiasynda bizde osy astyqtyń jinalǵan kólemi bar», - dedi S. Omarov.
Sonymen qatar, vedomstvo basshysy astyq baǵasynyń ósýi kóp faktorǵa bailanysty ekenin atap ótti.
«Bul jaǵdai barsha álemdegi astyq naryǵyna bailanysty ekenin atap ótken jón. Munymen qosa, biyl elimizdegi astyqtyń eki mln tonna kem jinalýy da áser etýde. Bizde ónim kóbirek jinalsa, onyń quny tómendep ketedi, al az bolsa, astyqtyń baǵasy joǵarylaidy. Búginde astyq baǵasynyń joǵarylaýyna qarsy bola almaimyn. Óitkeni árbir sharýa óziniń shyǵarǵan ónimine laiyqty baǵa alýy kerek», - dedi Saparhan Omarov.
Budan buryn habarlanǵandai, 14 qazanda Úkimet otyrysynda Qazaqstanda 19,1 mln tonna astyq bastyrylǵany aityldy.
«2019 jyly egin jinaý jumystary ýaqtyly bastalyp, oblys ákimdikteriniń derekterine sáikes jalpy dándi daqyldar egilgen 15,2 mln gektardyń 15,1 mln gektarynda ónim jinaldy. 19,1 mln tonna astyq bastyryldy. Biyl jazdyń ystyq jáne qurǵaq bolýyna bailanysy dándi daqyldar ónimdiligi tómendegenin atap ótkim keledi. Osynyń saldarynan ótken jylmen salystyrǵanda dándi daqyldar óndirisiniń tómendeýi kútilýde», - dedi Aýyl sharýashylyǵy ministri.
