Qus etiniń importyn almastyrýǵa 200 myń tonnalyq qus fabrikalaryn qosymsha paidalanýǵa berý kerek. Bul týraly Senatta depýtattarmen kezdesý barysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Sút boiynsha jyl saiyn keminde 25 ónerkásiptik taýarlyq sút fermasyn paidalanýǵa engizý jospary bar. Qus etiniń importyn almastyrý úshin qýaty 200 myń tonnalyq qus fabrikalaryn qosymsha paidalanýǵa engizý qajet. Qazir bizde 155 myń tonna qus etine arnalǵan 12 joba jobalaý men iske asyrý satysynda tur. Alma importyn almastyrý úshin bizge qosymsha 12,5 myń gektar alańda baq ósirý kerek, olar 105 myń tonna alma óndirýge múmkindik beredi», - dep toqtaldy ministr.
Onyń sózine qaraǵanda, ishki naryqty qantpen molyqtyrý boiynsha jańa 2 zaýyt salý jáne jumys istep turǵan 3 qant zaýytyna jańǵyrtý júrgizý, sondai-aq qant qyzylshasy egisterin ulǵaitý qajet.
«Import almastyrý jónindegi bul sharalardyń iske asyrylýy 2024 jylǵa qarai sektordyń negizgi kapitalyna shamamen 770 mlrd teńge investitsiia tarta otyryp, ishki naryqty 80 jáne 100 paiyzǵa deiin otandyq ónimdermen molyqtyrýǵa múmkindik beredi. Sondyqtan, biz tiimsiz sýbsidiialardan bas tartyp, nátijege baǵdarlanǵan sýbsidiialarǵa kóshý arqyly qoldanystaǵy memlekettik qoldaý sharalaryn jetildirýdi usynamyz», - dedi Saparhan Omarov.
Budan buryn habarlanǵandai, ministr Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyna ózgerister daiyndalǵanyn aitty.
«Búginde bizdegi áleýmettik mańyzy bar taýarlar tizbesine 19 taýar engen, olardyń ishinde 505 mln AQSh dollary somasyndaǵy tek 6 taýar boiynsha ǵana importqa táýeldimiz», - dedi S. Omarov.
