Qordai aýdanyna jumys sapary barysynda Jambyl oblysynyń ákimi Berdibek Saparbaev tótenshe jaǵdailardyń saldaryn joiý jónindegi oblystyq shtabtyń otyrysyn ótkizdi. Oǵan quqyq qorǵaý organdarynyń basshylary qatysty, dep habarlaidy "Ult aqparat".
Oblystyq shtabtyń málimetteri boiynsha, aýdanda bolǵan oqiǵalar barysynda 185 azamat zardap shekti. Olardyń 34-i aýrýhanaǵa jatqyzylǵan. Sondai-aq, 39 turǵyn úi, 20 kommertsiialyq nysan jáne 47 avtokólik órtengen.
Biylǵy 7-13 aqpan aralyǵynda Qordai, Qarasý, Aýqatty, Sortóbe baqylaý-ótkizý beketteri arqyly Qyrǵyz Respýblikasyna barlyǵy 23 131 adam ótip, 21 261 adam kirgen.
Aýyldardy tazalaý jumystaryna 250 adam jáne 53 birlik tehnika jumyldyrylyp, barlyǵy 680 tonna qurylystyq qoqys shyǵaryldy.
Qazirgi ýaqytta 55 dúken, 3 dárihana, 14 janarmai quiý beketteri jáne 30 basqa da kommertsiialyq nysan turaqty jumys jasaýda.
Joǵalǵan qujattardy qalpyna keltirý úshin Sortóbe aýyldyq okrýgi ákimdiginiń ǵimaratynda mobildi Halyqqa qyzmet kórsetý ortalyǵy quryldy. Ol ortalyq arqyly búginge deiin týý týraly 54 kýálik, 48 jeke kýálik, balalarǵa arnalǵan 1193 anyqtamalyq qaǵaz, jyljymaityn múlik týraly 15 qujat, neke týraly 8 kýálik, 1 pasport berilgen.
Sonymen qatar, 778 zardap shegýshi otbasyǵa barlyǵy 57,2 tonna alǵashqy qajettiliktegi zattar men azyq-túlikterden quralǵan gýmanitarlyq kómek kórsetildi.
Múlki zardap shekken azamattarǵa jalpy 3,9 million teńgeniń aqshalai kómegi úlestirilgen.
Búgingi tańda aýdanda turaqty jaǵdai saqtalýda, quqyqtyq tártipti qamtamasyz etý boiynsha tiisti jumystar jalǵasýda.
Otyrys qorytyndysy boiynsha oblys ákimi Berdibek Saparbaev turǵyndardyń qaýipsizdigin qamtamasyz etý, zardap shekken nysandardy, múlikti, qujattardy qalpyna keltirý jáne eldi mekenderdegi qalypty tirshilik jaǵdaiyn qamtamasyz etý boiynsha birqatar tapsyrmalar berdi.
Buǵan deiin habarlaǵanymyzdai, B.Saparbaev Jambyl oblysynyń ákimi retindegi alǵashqy jumys saparyn Qordai aýdanyna jasady.
