Aqtóbe oblysy ákimi Berdibek Saparbaev telejúrgizýshiniń qazasynan keiin barlyq kópqabatty úidegi liftterdi tekseretin sarapshylar komissiiasyn qurýdy tapsyrdy.
Komissiia kópqabatty úilerdegi liftterdiń jaǵdaiy men qaýipsizdigine baǵa berip, olarǵa qyzmet kórsetetin kompaniialardy tekseredi.
"Bul oqiǵa bárimizdi eseńgiretip tastady. Endi qaitalanbas úshin tiisti sharalar qoldanýymyz qajet. Qala ákimdigi prokýratýra jáne basqa quzyretti organdarmen birigip, qysqa ýaqyt aralyǵynda barlyq liftterdiń jaǵdaiyn, sapasyn jáne tehnikalyq qyzmetin tekserip shyǵady. Sonymen birge basqarýshy kompaniialardyń mamandaryn, azamattar qaýipsizdigin qamtamasyz etý boiynsha mindettilikterin qanshalyqty oryndaitynyn qadaǵalaý kerek", — dedi Saparbaev.
Berdibek Saparbaev marqum Aizat Ábdisamattyń týǵan-týystary men jaqyndaryna kóńil aitty.
Qaiǵyly oqiǵa 12-shi shaǵyn aýdannyń №19 úiinde bolǵan. "Qazaqstan Aqtóbe" arnasynyń telejúrgizýshisi Aizat Ábdisamat úsh jastaǵy qyzymen birinshi qabattan liftke otyrady, ekinshi qabatqa jetkende, lift toqtap, áiel adam shyǵyp úlgermepti. Aizattyń sol aiaǵyn esik qysyp qalǵan. Ol alǵan jaraqatynan qaza tapty.
Kishkentai qyz jabyq bas súiek-mi jaraqatyn alǵan. Qazir ol týystarynyń qolynda. Politsiia atalmysh derekke qatysty qylmystyq is qozǵady.
