Jambyl oblysynyń ákimi Berdibek Saparbaev jumys saparymen Taraz qalasyn aralap, oblys ortalyǵyn abattandyrý jobalarynyń júzege asyrylý barysymen tanysty, dep habarlaidy "Ult aqparat" Jambyl oblysy ákimdigine silteme jasap.
Aimaq basshysy aldymen ál-Farabi jáne Tóle bi kósheleriniń qiylysyndaǵy alleia qurylysy basyna bardy. Joba avtorlarynyń aitýynsha, munda uly oishylǵa eskertkish ornatý jáne qala turǵyndarynyń tynyǵýyna arnalǵan aýmaqty abattandyrý sharalary josparlanǵan.
Alaida, Taraz qalasynyń bir top turǵyndary bul qurylysqa qarsylyq bildirdi. Olardyń birqatary Berdibek Saparaevqa saiabaq qurylysyn basqa orynǵa aýystyrý týraly júgingen bolatyn.Turǵyndar zirattyń janynda ornalasqan aýmaqta eski jerleý oryndarynyń bolýy múmkin ekendigin alǵa tartady.
Aimaq basshysy qala ákimi Aitqazy Qarabalaevqa turǵyndardyń belsendi ókilderimen kezdesip, bul máseleni jan-jaqty saralaýdy, ortaq ymyraly sheshimge kelýdi tapsyrdy. Al, oǵan deiin merdiger kompaniia barlyq jumystardy toqtata turýy tiis.
