Úkimet basshysynyń orynbasary Berdibek Saparbaev pen Nur-Sultan qalasynyń ákimi Altai Kólginov elordadaǵy №76 mektep-litseide ótken ekologiialyq saǵatqa qatysty, dep habarlaidy QazAqparat.
Ekologiialyq saǵat búgingi tańda respýblikanyń barlyq mektepterinde ótip jatyr. Keń kólemdi aktsiiany qoldaýǵa Úkimet basshysynyń orynbasary Berdibek Saparbaev pen Nur-Sultan qalasynyń ákimi Altai Kólginov te atsalysty. Bilik ókilderi №76 mektep-litseidiń jumysymen tanysyp, oqýshylardyń aldynda sóz sóiledi.
«Adamnyń densaýlyǵynyń myqty bolýy, uzaq ómir súrýi – ishetin sýyna, jutatyn aýasyna bailanysty. Aldymyzdaǵy 6 qazan kúni dúniejúzilik tirshilikti qorǵaý kúni atalyp ótedi. Sonyń qarsańynda Qazaqstan Úkimeti barlyq ákimdiktermen birigip, mektepterde eko-saǵat ótkizip jatyr. Búgingi tańda bul aktsiia Qazaqstannyń 7 myń mektebinde ótkiziledi. 3 millionǵa jýyq oqýshy osy saǵatqa qatysady. Tabiǵatty qorǵaý – kishkentai baladan bastap eńkeigen qarttyń moinyndaǵy mindet. Qazaqta «artyńda mal qalǵansha, tal qalsyn» degen sóz bar. Taldyń qandai mańyzy baryn sizder bilesizder. Aýamyz taza bolý úshin ottegi kóp bolýy kerek. Ottegini aǵashtar men gúlder shyǵarady. Sondyqtan, ata-babamyzdan bizge kele jatqan uǵymǵa adal bolýymyz kerek», - dedi mekteptiń kontsert zalynda oqýshylardyń aldynda sóz sóilegen Berdibek Saparbaev.
Úkimet basshysy oqýshylarǵa únemdi bolýǵa shaqyrdy. Aitýynsha, sý, jaryq – bári de tiimdi paidalanýy kerek. Premer-ministr orynbasarynyń sózin qostaǵan shahar basshysy Altai Kólginov te ekologiialyq saǵattyń basty mańyzyn túsindirdi.
«Eń bastysy, bul - tárbie, mádeniet. Qala degen – ortaq úi. Bárimiz bir memlekettiń – úlken otbasynyń múshesimiz. Aldymen, tárbieli ári mádenietti bolýymyz kerek. Kezinde Ál-Farabidiń «Tárbiesiz bilim – adamzattyń qas jaýy» ekenin aityp ketkenin bilesizder. Mádenietimiz – ózimizdiń tárbiemiz. Prezidentimiz Qasym-Jomart Kemeluly eko-chellenjdi bastady. Qarasaq, elorda mańyndaǵy kól jaǵalarynyń barlyǵynda qoqys shashylyp jatyr. Ol qoqysty ózge planetadan bireý ákelip tastaǵan joq qoi. Bir qýantqany, stýdentter, jastar kelip, ainalamyzdaǵy kólderge baryp, mańaiyn tazartyp berdi. Uiada ne kórse, ushqanda sony iledi deidi. Tap solai – ainalamyzdyń taza bolýy siz ben bizge bailanysty», - dedi Altai Kólginov.
Osydan keiin Berdibek Saparbaev men Altai Kólginov №76 mekteptiń aýlasyna oqýshylarmen birge aǵash otyrǵyzdy. Úkimet basshysynyń orynbasary aǵash otyrǵyzý kezinde oqýshylarǵa «tal egý bir bólek – ony kútip-baptaý ekinshi mindet» ekenin eskertti.
