QR Premer-Ministriniń orynbasary Berdibek Saparbaevtyń tóraǵalyǵymen meditsinalyq saqtandyrýdy engizý máseleleri boiynsha keńes ótti, dep habarlaidy QR DSM baspasóz qyzmeti.
Buǵan deiin Qazaqstan Prezidenti Qasym-Jomart Toqaev Úkimetke áleýmettik meditsinalyq saqtandyrýdy júzege asyrý máselesine jaýapkershilikpen qaraýdy tapsyrǵan bolatyn.
Eljan Birtanov Densaýlyq saqtaý júiesin meditsinalyq qyzmetti meditsinalyq saqtandyrý boiynsha kórsetýge daiyndaý týraly baiandady.
Qazir daiyndyq jumystary bes negizgi baǵyt boiynsha júrgizilýde: quqyqtyq bazany qalyptastyrý, Densaýlyq saqtaý ministrliginiń aqparattyq júielerin jaqsartý, qorǵa aýdarylǵan aqshaǵa monitoring júrgizý jáne saqtandyrylǵan adamdardy esepteý, aqparattyq-túsindirý jumystary, Qaraǵandy oblysynda meditsinalyq saqtandyrýdyń pilottyq jobasyn engizý.
1 qyrkúiekten bastap engizilgen meditsinalyq saqtandyrýdy testileý aldyn ala máselelerdi anyqtaýǵa jáne MÁMS-ke tolyq kóshý kezinde táýekelderdi joiýǵa kómektesedi.
Eljan Birtanov ózge de memlekettik organdarmen birlesip sheshýdi talap etetin birneshe máseleni atady.
«Meditsinalyq saqtandyrý tabysty jumys isteý úshin halyqty barynsha kóbirek tartý kerek. Meditsinalyq saqtandyrý qory saqtandyrylǵan adamdardyń sanyn turaqty túrde eseptep, monitoring júrgizedi.
Búgingi tańda, bizdiń baǵalaýymyz boiynsha, azamattardyń 94,6% MÁMS júiesimen qamtylǵan, al halyqtyń shamamen 5,4% nemese 1 mln adam saqtandyrylmaǵan», - dedi Densaýlyq saqtaý ministri.
Beiresmi ózin-ózi jumyspen qamtyǵan halyqty ózektendirý máselesi boiynsha vedomstvo basshysy 687,7 myń adamnyń mártebesi anyqtalmaǵanyn atap ótti.
Sonymen qatar, ministr eńbek jáne salyq zańdarynyń oryndalýyn baqylaýdy kúsheitý qajet ekenin eske saldy.
Selektorlyq rejimdegi keńeske óńirlerdegi ákimdikterdiń, densaýlyq saqtaý basqarmalarynyń ókilderi qatysty, olar meditsinalyq saqtandyrýdy engizýge tehnikalyq daiyndyq, 2020 jyldyń qańtarynan bastap meditsinalyq kómek kórsetýdegi ózgerister jaily halyqty habardar etý týraly baiandady.
«Meditsinalyq saqtandyrý árbir turǵynǵa áser etedi, sondyqtan memlekettik organdar saqtandyrý meditsinasyna birqalypty kóshý úshin barlyq qajetti sharalardy qabyldaýy tiis. Olar úilesimdi jáne ózara júieli jumys isteýi tiis. Eń basty másele - balalardan bastap eresekterdiń barlyǵyn esepke alý qajet. Osy aida halyq mártebesin ózektendirý, MÁMS júiesine jeńildik jasalǵan sanattar boiynsha qatysýshylardy retteý jumystaryn aiaqtaý kerek», - dedi Berdibek Saparbaev.
Sonymen qatar, ákimdikterge 1 qazanǵa deiin meditsinalyq uiymdardy kompiýtermen jabdyqtaý jáne internetpen qamtý jumystaryn aiaqtaýdy tapsyrdy.
