Jambyl oblysynyń ákimi Berdibek Saparbaev jumys saparymen Qordai aýdany Qasyq aýyldyq okrýgine bardy, dep habarlaidy "Ult aqparat" aimaq basshysynyń baspasóz qyzmetine silteme jasap.
Qasyq aýyldyq okrýginiń ákimshilik ortalyǵynda – Qordai aýylynyń aýdan ortalyǵyna jaqyn ornalasqan Áljan ana aýylynda Berdibek Saparbaev Áljan ana tarihi murajaiy men aýyldyń Mádeniet úiin aralady.
Aita keteiik, bul aýyl Qasyq dep atalǵanǵa deiin, osy jerde eldiń Tuńǵysh Prezidentiniń anasy Áljan-ana týyp, ómir súrgen. 2017 jyly Jambyl oblystyq máslihatynyń sessiiasynda oblystyq onomastika komissiiasynyń Qasyq aýylynyń ataýyn Áljan ana dep ózgertý týraly sheshim qabyldandy.
Sonymen qatar, Berdibek Saparbaev bir aýysymda 15 kelýshige arnalǵan aýyldyq dárigerlik ambýlatoriianyń jumysymen tanysty. Meditsinalyq mekemeniń shtattyq quramy 14 qyzmetkerden turady, onyń ekeýi - dáriger jáne jeteýi orta deńgeili qyzmetker. Oblys ákimi mindetti meditsinalyq saqtandyrý, vaktsinatsiia, skrining júiesiniń engizilýin baqylaýdy, sondai-aq patsienttermen jumys sapasyn jaqsartýdy tapsyrdy.
Aimaq basshysy osy aýylda jastardyń bos ýaqytyn uiymdastyrý, qyzyǵýshylyqtary boiynsha ártúrli úiirmeler ashý qajettigine nazar aýdardy. Mádeniet úii janynda búginde kitaphana, dombyra jáne vokal oinaý úiirmeleri jumys isteidi.
Áljan ana aýylyndaǵy Turar Rysqulov atyndaǵy №23 mektepte 850 muǵalim 85 balaǵa sabaq beredi, sport zaly, tolyq jabdyqtalǵan himiia kabinetteri, mýltimediialyq kabinet, joǵary synyp oqýshylaryna arnalǵan sheberhanalar, úlken kitaphana bar. Pedagogikalyq ujymmen kezdesý barysynda aimaq basshysy muǵalimderdiń nazaryn tárbie jumysyn kúsheitýge jáne ata-analarmen tyǵyz qarym-qatynas ornatý qajettiligine aýdardy. Berdibek Saparbaev oqý korpýsyna aǵymdaǵy jyly kúrdeli jóndeý jumysyn júrgizý týraly usynystaryn qoldady.
Odan ári aimaq basshysy Qordai aýyly mańynda ornalasqan biregei akvaponikalyq jylyjaimen tanysty, ol tek askók pen kókónis qana emes, sonymen qatar balyq ósirýge de múmkindik beredi.
Qazir munda gidroponika ádisimen salattyń 15 túri ósiriledi. 0,2 gektarǵa kóktemgi qulpynai egildi. 2019 jyly paidalanýǵa berilgen jobanyń quny - bir milliard teńge. Jylyjaidyń ózi 0,7 gektar aýmaqty alyp jatyr. Tolyq qýatqa shyqqannan keiin munda 20 turaqty jumys orny bolady.
Aimaq basshysy, ásirese, maýsymnan tys ýaqytta oblys halqyn arzan, jergilikti ónimdermen tolyq qamtamasyz etý úshin joǵary tehnologiialyq jylyjai fermalaryn belsendi túrde damytýdy tapsyrdy.
Jambyl oblysy ákiminiń baspasóz qyzmetinen habarlaǵandai, jumys saparyn aiaqtai otyryp, Berdibek Saparbaev barlyq aitylǵan tapsyrmalar sapaly jáne belgilengen merzimde oryndalýy tiis ekenin atap ótti. Olardyń oryndalýyn ol ózi baqylaityn bolady.
Eske sala keteiik, jýyrda Jambyl oblysy ákimdiginde óńirdiń áleýmettik máseleleri talqylandy. Berdibek Saparbaev oblystyń áleýmettik saiasatyndaǵy basym baǵyttardy odan ári damytý jáne eń aldymen jańa turaqty jumys oryndaryn qurý týraly óz kózqarasyn usyndy. Óńir negizinen agrarlyq bolǵandyqtan, Aýyl sharýashylyǵyn damytý oblystyń ekonomikasy men áleýmettik salasynda mańyzdy ról atqarady. Sondai-aq, 2019 jyly bastalǵan aýyl turǵyndarynyń tabysyn arttyrý jobasy aldaǵy ýaqytta qarjylandyrý kólemin keńeitýge jáne kóp adamdardyń materialdyq jaǵdaiyn jaqsartýǵa múmkindik beredi.
