QR Premer-Ministriniń orynbasary Berdibek Saparbaev Qaraǵandy oblysyna jumys sapary barysynda belsendi jastarmen kezdesti. Basqosý Qaraǵandy memlekettik tehnikalyq ýniversitetiniń qabyrǵasynda ótti. Jastar vitse-premerge ózderiniń alǵashqy tabystary týraly aityp berdi, dep habarlaidy "Ult aqparat" primeminister.kz saityna silteme jasap.
«Jastar qoǵamnyń qozǵaýshy kúshi bolyp tabylady. Árbir adam onyń bolashaǵy jaqsy bolǵanyn armandaidy. Bizdiń maqsatymyz - jastarǵa damý úshin jaǵdai jasaý. Jastar jyly, aldaǵy eriktiler jyly jáne Prezidenttik kadrlyq rezervke qabyldaý - bul qadamdardyń barlyǵy elimizde jastar ózderiniń maqsattaryn júzege asyryp, baqytty bola alatynyn aitady», - dedi Berdibek Saparbaev.
Qazaqstanda Jastar jylynda 89 iri is-shara júzege asyrylyp jatyr, turǵyn úi problemasyn sheshý boiynsha da sharalar ázirlendi, jas kásipkerler de qoldaýǵa ie bolǵan. Kezdesýge stýdentter, jas kásipkerler, jumysshylar, sportshylar, eriktiler jinaldy. Jas kásipker Birjan Imanov, «Eńbek» baǵdarlamasynyń qatysýshysy Aleksandr Kontsevich biznestegi alǵashqy qadamdary týraly aityp berdi.
Premer-Ministrdiń orynbasary Berdibek Saparbaev pen Qaraǵandy oblysynyń ákimi Jeńis Qasymbek óńir jurtshylyǵymen kezdesti. Vitse-premer «Syndarly qoǵamdyq dialog – Qazaqstannyń turaqtylyǵy men órkendeýiniń negizi» atty Joldaýynda el Prezidentiniń alǵa qoiǵan mindetterin iske asyrý jónindegi sharalar týraly aityp berdi.
Kezdesýge sondai-aq densaýlyq saqtaý ministri Eljan Birtanov, Bilim jáne ǵylym ministri Ashat Aimaǵambetov, Eńbek jáne halyqty áleýmettik qorǵaý ministri Birjan Nurymbetov qatysty.
«Qoǵamdyq kelisim bolǵan kezde oń nátije de, ál-aýqat ta, gúldený de bolady. Prezident Qasym-Jomart Toqaev bul máselege úlken nazar aýdarady. Bul memleket pen qoǵamnyń arasyndaǵy dialogqa qatysty. Munda úkimettik emes uiymdardyń áleýetin tartý kerek. el Úkimeti eki tujyrymdamany ázirleýde: «tyńdaýshy memleket» jáne azamattyq qoǵamdy damytýdyń 2025 jylǵa deiingi tujyrymdamasy. Olar aǵymdaǵy jyldyń sońyna deiin daiyn bolýy tiis. Bul qujattarda Ashyq úkimet jáne halyqpen tiimdi keri bailanys máseleleri qozǵalady. Azamattardyń birde-bir ótinishi, birde-bir shaǵymy jaýapsyz qalmaýy kerek», - dep atap ótti Berdibek Saparbaev
Vitse-premer qoǵamdyq keńesterdiń qyzmetin kúsheitý qajettigin atap ótti. Daryndy balalardy qoldaý kartasy, balalar múddesin qorǵaityn 2030 jylǵa deiingi QR memlekettik saiasatynyń tujyrymdamasy ázirlenetin bolady. 2019 jyldyń sońyna deiin jinaqtardyń kiristiligin arttyrý maqsatynda zeinetaqy aktivterin investitsiialaý tásilderin qaita qaraý josparlanyp otyr.
Sonymen qatar Premer-Ministrdiń orynbasary Berdibek Saparbaev G. Golovkin atyndaǵy qaraǵandylyq sport kesheninde boldy. Onda jas sportshylar GGG qoldaý maqsatynda fleshmob ótkizdi. 6 qazanda Niý-Iorktiń belgili arenasynda álemge áigili qaraǵandylyq Gennadii Golovkin ýkraindyq Sergei Derevianchenkomen jekpe-jek ótkizedi. Bylǵary qolǵap sheberleriniń shaiqasynda báigege IBF jáne IBO nusqalary boiynsha orta salmaqtaǵy álem chempiony ataǵy tigildi.
Vitse-premer sport kesheniniń tárbielenýshilerine qoldaý kórsetip, jerlesimiz Qazaqstannyń dańqyn taǵy bir márte asqaqtatyp, jeńiske jetýin tiledi. Al jas sportshylardyń ata-analaryna balalardyń dene shynyqtyrýdaǵy jetistikteri men rýhani-adamgershilik tárbiesine kóbirek kóńil bólýin tiledi.
«Biz oǵan barynsha qoldaý kórsetemiz, sáttilik pen jeńis tileimiz. Gennadii taǵy da álemniń úzdik boksshylarynyń biri ekenin dáleldeýi tiis. Balalaryńyzdyń sportpen ainalysatyny qýantady. Eger olar sportqa, ónerge tartylsa, túrli úiirmeler men sektsiialarǵa qatyssa, onda deni saý, tárbieli, bilimdi bolady, eń bastysy – quqyq buzýshylyq áreketterge barmaidy. Bizde kóptegen sporttyq jáne mádeni nysandar bar. Olardy barynsha paidalaný kerek, jastardy salaýatty ómir saltyna jappai jumyldyrý kerek. Al ata-analar buǵan yqpal etýi tiis», - dedi B. Saparbaev jas qaraǵandylyqtardyń ata-analarymen kezdesýi barysynda.
Vitse-premer aýyr atletika, kúres, basketbol zaldaryn jáne júzý basseinin aralap kórdi.
